Владина делегација учествува во работата на главната дебата на Генералното собрание на ОН

Објавено на 24.09.2019 во 23:01:18 часот | Македонија

Генералното собрание на Обединетите нации, кое оваа година се одржува 74. пат, денеска и официјално почна со работа со свечен пречек на шефовите на држави и влади и шефови на делегациите од страна на генералниот секретар на ОН, Антонио Гутереш.

Премиерот Зоран Заев со сопругата Зорица Заева присуствуваше на свечениот прием што го приреди Гутереш во чест на 74-тото Генерално собрание по што следуваше отворањето на генералната дискусија „Забрзување на мултилатералните напори за елиминирање на сиромаштијата, за квалитетно образование, за климатска акција и за инклузивност“, која оваа година ги опфаќа темите на сите пет самити.

Во работата на генералната дискусија учествуваше и владината делегација од Северна Македонија предводена од премиерот Зоран Заев заедно со заменик-претседателот на Владата задолжен за европски прашања, Бујар Османи, и министрите за надворешни работи, за здравство и за животна средина и просторно планирање, Никола Димитров, Венко Филипче и Насер Нуредини.

Во текот на денот премиерот Заев ќе оствари повеќе билатерални средби и ќе присуствува на приемот, што за шефовите на делегациите на Генералното собрание на ОН го приредува претседателот на САД, Доналд Трамп, како и на приемот на Европската Унија, каде што домаќин е претседателот на Европскиот совет, Дoналд Туск.

 

 

loading...

 

Македонија

Свет