Новинарите од грчката новинска агенција присуствуваа на погребот во Кочани и професионално ја пренесоа траорната атмосфера и изјавите на граѓаните со кои разговарале за трагичниот случај што го потресе целиот Балкански Регион. Северна Македонија ги погребува загинатите од пожарот во ноќен клуб во Кочани, кој изби во раните утрински часови минатата недела, а ова е единствената тема не само во вестите туку и во разговорите меѓу луѓето на улица. Штом се премине границата од грчкиот премин Евзони во Северна Македонија, знамињата во должина на трасата се виорат на половина копје, додека некогаш живиот ритам на балканската музика на радиото им отстапи место на тажни звуци, сразмерни на околната атмосфера. На бензинска пумпа на голем синџир за нафта, непосредно пред Гевгелија, касиерката се мачи да ги задржи солзите кога ја прашуваме за насока до Кочани. – Ги изгубивме нашите деца, она низ што минуваме е незамисливо – вели таа, а вработениот кој штотуку ни го наполни резервоарот додаде: „Ни во војна не сме имале толкава трагедија“.
Како што се приближуваме до Кочани, полициското присуство се зголемува, давајќи им насоки на оние што сакаат да се приближат до гробиштата, каде што малку подоцна ќе се одигра „завршниот чин на трагедија каква што регионот досега не ја видел“, изјави за АПА-МПА жител на овој град, кој се наоѓа на околу 100 километри од главниот град Скопје. – Денес не е време за зборови, ова е време на тишина за нашите мртви деца – додаде тој додека одеше накај местото каде што се ископани 24 гроба еден до друг за да ги примат покојните. – Уште 7-8 гроба се расфрлани горе – ни објасни тој и нè замоли да бидеме чувствителни на болката на роднините бидејќи има голема непријатност поради некои фотографии кои, како што рече, беа објавени во јавноста во претходните 24 часа. Нешто што го забележавме е додека одевме кон посебниот простор што е одреден во аголот на гробиштата за претставници на медиумите, е што пред камерата застана автомобил на сред пат и силно ни викна: „Нема фотографии!“. До свежо ископаните гробови е поставена платформа, додека во еден агол трпеливо чекаат 20-ина работници.
Во исто време, екипите на Црвениот крст се на готовност за сè што може да искрсне, додека новинарите и другите медиумски професионалци од соседните земји ја комплетираат сцената на гробиштата, а полициските службеници постојано даваат инструкции. Повеќето од 59-те жртви на трагедијата се од Кочани, каде што во четврток напладне, во особено тешка атмосфера, ќе се одржи нивниот погреб, а опело ќе одржи архиепископот на Македонската православната црква г.г. Стефан. Погребите на дел од жртвите ќе се извршат час порано во Штип. – Она што е сигурно е дека оваа рана нема да зарасне наскоро. И нема да заборавиме – рече жител на Кочани, меѓу многуте волонтери на локацијата, облечени во црни маици на кои беше испишано: „Почивај во мир, сакан мој ангел“.
