Од вкупната рамка од шест милијарди евра, во првиот петгодишен период ќе се повлечат околу 2,2 милијарди за инфраструктурни проекти, вклучувајќи ја пругата од Табановце до Гевгелија. Министерката за финансии Гордана Димитриеска-Кочоска уверува дека изборот на фирми ќе биде според Законот за јавни набавки, со повеќе понуди и без авансни плаќања. Од помпезно најавените шест милијарди евра „инвестициски бум“ како дел од договорот за стратешко партнерство со Обединетото Кралство, во првите пет години ќе се повлечат 2,2 милијарди евра или околу една третина од парите. Ова во интервју за „360 степени“ на МРТ 1, го најави министерката за финансии и потпретседателка на владејачката ВМРО-ДПМНЕ Гордана Димитриеска-Кочоска. Според неа, овие средства ќе се користат за реконструкцијата и изградба на брзата пруга од Табановце до Гевгелија и неколку болници. „Две милијарди на пет години се по 400 милиони евра. Толку е годишното зголемување на јавниот долг по однос на овие инвестиции кои, од друга страна, ќе придонесат за раст на економијата“, рече Димитриеска-Кочоска.
Таа нагласи дека изборот на британски компании кои ќе ја вршат изведбата ќе се се прави според Законот за јавни набавки, кој предвидува повеќе понуди и избор на најповолната. Во однос на вклучувањето на локални подизведувачи, Димитриеска-Кочоска посочи дека деталите ќе ги дефинира Министерството за транспорт. Таа исто така потврди дека нема да има авансни плаќања, туку средствата ќе се повлекуваат по извршени работи и фактурирање. „Парите ќе ги влечеме така како што ќе реализираме. Изградиле еден дел, фактурираат, користиме средства од банката, плаќаме. И тоа ќе трае пет години“, објасни министерката. Димитриеска-Кочоска истакна дека договорите ќе бидат јавни и дека ќе се почитуваат сите законски процедури за да се обезбеди транспарентност и конкурентност во процесот. Извор: Новинска агенција МЕТА
