Цели дваесет години не биле одржувани двете брани во либискиот град Дерна коишто попуштија и направија трагедија што го потресе светот со своите 20.000 жртви, а ги градела српската компанија „Хидротехника-Хидроенергетика“ во југословенско време.
На сајтот на компанијата може да се види дека таа ги градела браните меѓу 1973 и 1977 година, како и голем број други инфраструктурни проекти, објави Н1. Дерна била поплавена и во 1986 година, но тогаш браните успеале да управуваат со водата и немало сериозни штети во градот.
Едната брана имала капацитет за складирање од 1,5 милиони кубни метри вода, додека другата, според овој медиум, била со капацитет до 22 милиони кубни метри. Браните имале јадро од набиена глина со камен „оклоп“, се наведува на сајтот.
На веб-страницата „News Libya“ има статија на арапски во која се објаснува историјата на браните. Тој забележува дека Дерна била изложена на серија поплави, а најголемите биле во 1941, 1959 и 1968 година.
Заменик-градоначалникот на Дерна, Ахмед Мадруд, призна дека браните не биле одржувани од 2002 година, а на социјалните мрежи се појавија и шпекулации дека средствата предвидени за тоа биле пренаменувани.
– Браните лошо се одржуваа, што се должи како на безбедносниот хаос во земјата, така и на инертноста на либиските власти – изјави експертот од оваа област Мохамед Ахмед за водечкиот либиски сајт „Ал-Васат“.
Сепак, експертите велат дека е прерано да се каже дали браните пукнале поради преоптовареност со вода или поради нивната состојба.
– Според она што може да се забележи, браните веројатно биле изградени од мешавина од камен и глина, што не е така цврст материјал како бетон. Ваквите брани се подложни на прелевање на водата, што за бетонските брани не е проблем, за разлика од овие од камен – изјави Драган Савиќ, професор по хидроинформатика на Универзитетот Ексетер во Велика Британија.
Експертите се согласни дека прво пукнала горната брана, оддалечена 12 километри од Дерна, испуштајќи вода низ долината, која ја преплавила браната која се наоѓа многу поблиску до градот. Од источнолибиската влада кажаа дека е збришана една четвртина од градот.
Научниците велат дека врнежите што ги донесе бурата Даниел биле екстремни, дури и до 200 милиметри по квадратен метар, што исушената земја не можела да го апсорбира.
Најновите информации велат дека водата во Дерна се кренала на ниво од 7 метри и дека жителите имале само неколку минути да избегаат од поплавата. Доселеник од Либија за Би-Би-Си изјави дека никој во Либија не го сфатил невремето сериозно. Либиските власти беа обвинети дека објавиле полициски час токму за време на ноќта кога се случила поплавата.
Четири дена подоцна, помошта едвај доаѓа, а преживеаните го пробиваат патот низ урнатините во потрага по исчезнатите.
Канцеларијата на Обединетите нации за координација на хуманитарни прашања (OCHA) процени дека во Либија, поради тековната политичка нестабилност, конфликти и влошената економија, помошта е неопходна за околу 823.000 луѓе, меѓу кои 240.000 деца, а особено ќе биде изразена во следните три месеци.
Според теориите на некои експерти, на размерите на несреќата влијаела и каскадната удолница со која водата излетала низводно од првата брана.
