Туристичко-угостителскиот комплекс „Македонско село“ во Горно Нерези крај Скопје беше затворен шест години, а на почетокот на годинава Владата предводена од ВМРО-ДПМНЕ вети дека напролет ќе го рестартира преку изнајмување на објектот, кој ќе биде даден под закуп на приватна фирма. Новиот закупец ќе има задача да отвори угостителски објекти и да обезбеди туристички услуги, вклучувајќи и ноќевање во куќите кои ги симболизираат различните региони на Македонија, пишува Вистиномер.
Директорот на Службата за општи и заеднички работи (СОЗР), Ивица Томовски, на почетокот на декември минатата година истакна дека иако „Македонско село“ е во лоша состојба – искршени клупи, оштетени кровови и фасади, и нефункционални електрични возила – сепак внатрешноста на куќите кои се изградени во 12 стилови кои го отсликуваат архитектонското наследство на ова поднебје се во солидна состојба. Ветување: Комплексот ќе биде издаден под наем на период од најмалку 10 години, со цел на закупецот да му се овозможи исплатливо вложување во обновата. Очекуваме до 1 мај комплексот повторно да биде отворен. За санација на објектите ќе бидат потребни најмалку 200.000 евра, изјави Томовски. [Извор: Плус инфо „МАКЕДОНСКО СЕЛО“ ЌЕ ОЖИВЕЕ НАПРОЛЕТ Ќе има ресторани, ама и соби за преспивање; датум: 03.12.2024]
ОБРАЗЛОЖЕНИЕ: Комплексот „Македонско село“ започна со работа во 2016 година, под концесионерство на фирмите „Тинекс“ и хотел „Квинс“ во сопственост на поранешниот градоначалник на Општина Центар, Владимир Тодоровиќ, кои плаќаа по 3.5 илјади евра месечно за закуп на објектот. Тие се повлекоа од „Македонско село“ во 2018 година, како причина наведоа дека имале финансиски загуби, а договорот за концесија им овозможувал да го прекинат закупот. Новата влада по пат на електронско јавно наддавање, преку системот со кој управува и оперира Министерството за финансии, му го додели „Македонско село“ на концесионерот „Ла тераца“, кој во наредните 15 години ќе стопанисува со објектот за 3.5 илјади евра месечен закуп. Концесионерот има обврска да ги преземе сите потребни активности за оспособување на комплексот за почеток со работа од 1.06.2025 година, информираа од владината Служба за општи и заеднички работи.
Во изминативе шест години додека не беше во функција, „Македонско село“ генерираше финансиски загуби од над 350 илјади евра. СОЗР редовно ги намирувал трошоците за осигурување и обезбедување. Поради состојбата на запуштеност и потребата од реновирање, концесионерот од септември ќе стартува со плаќање на закупнината. А, сето тоа што ќе го инвестираат, останува во сопственост на државата, велат од СОЗР. Инаку, веќе е дадена и банкарска гаранција во висина на пет отсто од вкупната сума за 15-годишниот закуп, пишуваат порталот pari.com.mk. Порталот специјализиран за финансии го портретира концесионерот „Ла тераца“ на ХСХ Груп ДОО Скопје како етаблирано име во угостителско-хотелиерскиот бизнис. Групацијата го поседува познатиот ресторан „Ла тераца“ на скопскиот Плоштад „Македонија“ и хотелот во Дојран „Ла тераца дојранска“. Комплексот „Македонско село“ содржи 12 објекти дизајнирани во автентичен етно стил – беровска, делчевска, кумановска, реканска, струшка, прилепска, тетовска, кратовска, галичка, битолска, велешка и куќа од Скопска Црна Гора – во кои македонските занаети и рестораните служат за анимација на гостите, а поседуваат и сместувачки капацитети.
Во периодот додека комплексот „Македонско село“ не функционираше објектите пропаѓаа и беа ограбувани, па се бараа решенија за негова ревитализација. Една од идеите за време на мандатот на претходната влада предводена од коалицијата на СДСМ и ДУИ беше „Македонско село“ да прерасне во стартап село кое би обединувало квалитетен простор за работа, живеење и вмрежување на младите луѓе кои започнале или ќе започнат нов бизнис, но не беше реализирана. Во секој случај, комплексот „Македонско село“ со новиот концесионер добива нова шанса да биде функционална и атрактивна туристичко-угостителска понуда за домашните и странските гости. Извор: Новинска агенција МЕТА
