Од обвинувања кон другите партнери за кукларство, на крај се чини дека всушност тој е кукларот кој ги влече конците и управува со своите политички партнери кои му дале доверба, пишува Вистиномер во контраспинот кој го пренесуваме во целост
Арбен Таравари може да оддава впечаток на сериозен прагматичен политичар. Но, кога со прагматизмот во политиката ќе се претера, како во неговиот случај, тогаш јавноста може брзо да стекне впечаток дека моралната вертикала што ја продавал била само фатаморгана, односно меур од сапуница. А, од обвинувања кон другите партнери за кукларство, на крај се чини дека всушност тој е кукларот кој ги влече конците и управува со своите политички партнери кои му дале доверба, пишува Вистиномер во контраспинот кој го пренесуваме во целост.
Арбен Таравари, лидерот на Алијанса за Албанците и министер за здравство изјави дека ја напушта власта зашто не биле задоволни од односот на Владата и ВЛЕН кон положбата на Албанците во државата и од позицијата на државата кон евроинтеграциите. Она што го кажа синоќа по одлуката на партиските органи зошто си одат, всушност подецидно го појасни во неделата (09.05.), говорејќи на неформално предизборно претставување во Врапчиште. Во дел од тие изјави може да се регистрира спин:
Спин: Побаравме поддршка минатата година за да донесеме промени, но оваа промена што ја имаме не е промената што ја чекаа Албанците и тоа е непобитен факт. Владата некако се изгуби на патот кон ЕУ. Гледајте ја ситуацијата во државната администрација, има извонредна маргинализација и тенденција Албанците да бидат маргинализирани…Кога сите трчаат да влезат во Влада, ние сме навикнати да излегуваме од Владата…Сакаме да избегнеме да бидеме марионети кога сме во влада. Ова не можеме да го дозволиме…, бидејќи не сакам активистите да мислат дека сме сместени таму за да не мислиме на Албанците. Не можеме да ги вработиме, не можеме да им ја завршиме работата, затоа е подобро да се вратиме кај народот, рече меѓу другото претседателот на Алијансата за Албанците, Арбен Таравари.
Контраспин: Министерот за здравство (2017 и 2024-2025), Арбен Таравари, ќе биде запаметен како единствениот лидер на некоја од партиите на Албанците во Македонија кој врз основа на спинови прави влези-излези кога сака од централна власт и тоа со две дијаметрално спротивставени коалициски влади, на СДСМ и на ВМРО-ДПМНЕ. Тоа во таа смисла го прави да изгледа исклучително прагматичен политичар. Секако тоа е негово право и негов избор, но притоа во комуникациските ставови со јавноста ја извртува вистината, т.е. спинува за причините, а во конкретниот случај со евроинтеграциите и со позицијата на коалициската влада на ВМРО-ДПМНЕ – ВЛЕН и ЗНАМ кон Албанците.
Таравари: Мицкоски е суперзападно ориентиран! Таравари, кој беше и претседателски кандидат на ВЛЕН на изборите во 2024 г., до пред крајот на минатата, па и на почетокот на оваа година имаше цврсти ставови во поглед на владината политика за евроинтеграциите, наведувајќи дека С. Македонија има право да бара гаранции, во смисла дека кога процесот кога ќе започне со промена на Уставот, тој и ќе заврши без барање на нови отстапки од страна на Бугарија или некој друг од соседите. Зборувајќи во интервју на „Вин-Вин“ на ТВ Телма, во истиот ден кога во Скопје присуствуваше претседателката на Европската комисија Урсула Фон Дер Лаен (24.10.2024 г.), на прашањето на новинарката за ЕУ интеграциите и за тоа што претпоставува дека била позицијата на премиерот Христијан Мицкоски во разговорите со неа, Таравари одговори:
…„Многу легитимно и од премиерот, ни треба некаква гаранција – нели, ни даваат гаранции од 2018 година од Преспанскиот договор, па се случи 2019 година…Гаранција да ги започнеме и да ги завршиме преговорите. Јас мислам дека топ приоритет на оваа влада и на државата генерално е Македонија да се качи на возот за ЕУ, да не остане во двојката во која што се Косово и БиХ и да биде третата држава од таа група… Мислам дека по сѐ што се случуваше Македонија заслужува некаква потврда од Брисел и Вашингтон дека нема да се побара нешто екстра од Македонија. После 2018 година заслужуваме да имаме некаква стопроцентна увереност во Владата… Сигурен сум дека премиерот Мицкоски е прозападно ориентиран и тој прави доста напори Македонија за да не остане во таа група со Босна и Косово… мислам дека е суперзападно ориентиран…(Види ТУКА по 14 мин.). По ова следува дел каде што Таравари прави проценка дека по изборите во Бугарија и САД, С. Македонија ќе започне со уставните измени уште во декември, бидејќи ќе се најде некакво решение на релација Брисел-Софија-Вашингтон.
Таравари: Доколку си отидеме само ДУИ ќе печали
Во декември пак, Таравари уште еднаш се осврнува на ова прашање, директно одговарајќи што станало со предизборното ветување на ВЛЕН дека коалициската влада на ВМРО-ДПМНЕ во рок од 6 месеци ќе ги започне уставните измени или ќе излезе од Владата. Божем давајќи му рок на ВМРО-ДПМНЕ до јануари 2025 г. да ги отпочне уставните измени, Таравари, де факто, повторно ги брани позициите дека без гаранции ЕУ интеграциите ќе останат закочени, а дека ќар ќе има само ДУИ:
Си дадовме услов до јануари 2025 година да се направат уставните измени. Гледам дека еден од политичките аналитичари вели: „Рековте ли дека ќе ја условувате Владата ако не се направат уставните измени да излезете од Влада?“. Еве, хипотетички ви велам, Алијансата не е во Владата? Еве, ВЛЕН не е во Влада? Можеме ли ние Албанците сами да ги направиме уставните измени? Еве господинот Ахмети вели напуштете ја Владата и ВЛЕН решава да го послуша и ја напушта Владата. Но, што правиме? Каков е резултатот од тоа? Знаеме, но и премиерот во Собранието рече дека има постојан притисок. Господине, кажете ни што ќе се случи ако излеземе од Владата? Дали имате план? Велите дека не влегувате во Влада, ВМРО и ЗНАМ се, но без Албанците не може да има Влада. Практично може да има затоа што имаат над 60 пратеници со ЗНАМ. Но, колку ова ќе биде функционално? Господинот Ахмети не е јасен. Ајде да седнеме со ВЛЕН и да му кажеме дека тоа е планот. Така излегувате, ние влегуваме, не влегуваме… Постојано ДУИ носат луѓе да лобираат да влезат во Владата, ова изгледа парадоксално, рече Таравари и додаде „дека ДУИ на средбите со граѓаните покажува дека нема план“. (извор: ТУКА).
Истото Таравари го беседеше и во февруари 2025 година. Во интервју за РСЕ, кое беше предмет и на рецензија на Вистиномер, Таравари изјави: Колку што гледам, премиерот е подготвен, меѓутоа бара некаква гаранција. Дали тоа ќе биде од Софија, Брисел или Вашингтон, тоа е ирелевантно, но и дека ова е последно условување за Македонија. Дека е претерано условувањето кон Македонија и за ЕУ и за НАТО, тоа е непобитен факт. Ставовите на премиерот Христијан Мицкоски и на ВМРО-ДПМНЕ во меѓувреме не се промениле од предизборниот период, одговорот од Брисел и од Софија, исто така не е сменет, Вашингтон делува преокупирано со други проблеми, но Таравари сега веќе нема разбирање за гаранциите и за него евроинтеграциите стануваат еден од клучните проблеми поради кои треба да се напушти Владата. И ВЛЕН.
Спин е и ставот на Таравари за балансерот како проблем. Говорејќи во истото интервју на Вин-Вин откако беше донесена одлуката на Уставниот суд за укинување на балансерот како алатка, Таравари остро распали по ДУИ дека и таа гласала во стратегијата за реформи на администрацијата да се укине алатката, а освен тоа наведе и бројки дека алатката не покажала многу ефикасност, бидејќи пред нејзиното воведување во 2015 година биле вработени 7 отсто Албанци во јавниот сектор, а по воведувањето до 2024 г. само 1,5 проценти. Таравари тогаш се заложи дека треба да се најде сеопфатно законско решение во кое ќе бидат решени и други диспаритети при вработувањето во јавниот сектор, кои ќе се надминат со соодветна родова политика, итн: Tреба да изнајдеме решение коешто е прифатливо со што пошироко консензус. (од 20-40 мин.види ТУКА)
Истото го изјави и десетина дена претходно: Подготвуваме нов закон, кој се надевам дека идната недела ќе биде на јавна дебата. Ќе бидеме во координација со партнерите во коалиција. Од сите страни е констатирано дека ‘балансерот’ не функционираше како што треба Сега Таравари вели: Ако не можеме да ги вработуваме Албанците зошто сме во Влада? Истиот однос лидерот на АА го имаше и при актуелизацијата од страна на ДУИ дека Албанците смислено се маргинализираат во државата од страна на Владата, потсетувајќи на предизборни и постизборни изјави на функционери на ВМРО-ДПМНЕ и на ЗНАМ. Сите такви тврдења ги отфрлаше, а сега тоа за него е актуелен проблем, a Таравари и неговите сопартијци не сакале да бидат марионети, т.е. кукли додека конците ги влечел некој друг. Арбен Таравари може да оддава впечаток на сериозен прагматичен политичар. Кога Зоран Заев стапи во коалиција со Зијадин Села, а Таравари беше именуван за министер, тој го напушти здравство по само два месеца, а проблемите во неговиот роден град Гостивар ги оцени како посуштински важни од проблемите во здравството во државата. Всушност, по негирањето во август 2017 г., во септември Таравари дури изјави и дека сакал да си се провери во базата! Овој пат, од позиција лидер на АА влегувајќи преку ВЛЕН во коалиција со Мицкоски, екимот Таравари „дури“ по десет месеци го напушта здравството. Од прагматични потреби. За него и неговата партија, тој повторно во прв план ги става проблемите во Гостивар и уште неколку други општини меѓу кои и Сарај. Прагматично. Но, кога со прагматизмот во политиката ќе се претера, како во неговиот случај, тогаш јавноста може брзо да стекне впечаток дека моралната вертикала што ја продавал била само фатаморгана, односно меур од сапуница. А од обвинувања кон другите партнери за кукларство, на крај се чини дека всушност тој е кукларот кој ги влече конците и управува со своите политички партнери кои му дале доверба. Извор: Новинска агенција МЕТА
