Современиците на големиот актер Ристо Шишков го познаваат како голем родољуб кој силно сакал да ја види Македонија самостојна и независна. За жал, тој не го дочекал Денот на независноста, но токму на тој ден, веќе 32 години, се отвора Фестивалот на камерен театар кој го носи неговото име. Така беше и вечерва.
Ја имав честа и задоволството да го отворам 32 издание на овој меѓународен фестивал, единствениот во земјата па и пошироко кој е посветен на актерот. Струмица треба да биде горда што го чува и негува фестивалот како едно од своите најомилени културни чеда.
Тоа ќе го прави и во иднина во чест на актерите и во чест на бардот на македонското глумиште, неповторливиот Ристо Шишков.
По отворањето, го имав задоволството да му ја врачам награда „Ристо Шишков“ на минатогодишниот лауреат, актерот на МНТ Јордан Симонов, а потоа и да уживам во претставата „Црна дупка“ од Горан Стефановски во режија на Љупчо Горгиевски, а во маестрална изведба на актерите на струмичкиот театар.
Нека ни се множат убавите културни настани под нашето струмичко небо.
