Секојдневно сме окупирани од разни изјави на владини преставници во врска со работењето на јавните градски претпријатија, особено Комунална Хигиена, Паркови и Зеленило, ЈСП, а се чудам зошто го заобиколуваат Водовод и Канализација.
Во последната изјава Министерот за Локална самоуправа, министерот Перински вели “Овие прашања се премногу крупни за да се одлучуваат така брзо”.
Жал ми е што морам да кажам дека, напротив господине министере вашиот предлог беше избрзан и кажан онака готово во бес.
Гледам дека немате концепт за решавање на овие проблеми.
Ви предлагам нај итно што може:
1. Да се одредат 2 локации, источна и западна за одлагање на градежниот шут.
Кога дома реновирате или кога се гради објект ќе повикате некој да исфрли шут, тој доаѓа, го товари и го истура не кај првите туку кај вторите контијнери, по некој нефреквентен пат, во некој дол или каде ќе стигне само да не го види никој.
Градежен шут има и мора да постои место каде тој ќе се носи.
2. Не постои место за одлагање на кабаст отпад, домашен и канцелариски мебел и апарати за домаќинство.
Треба од постоечките претпријатија вишокот на работна сила да се ангажира и насочи со возила што ќе ги купиме ние и градот, да го собираат овој материјал и потоа да се рециклира, преработува, оплеменува и истото да генерира приходи.
3. Нај итно да се донесе закон за Комунална инспекција.
Сега комуналниот инспектор не смее да легитимира, не смее да приведе, ако прекршителот реши да бега не смее да го запира, казните се минимални, а за да се ова се заврши мора да се повика МВР, да се чека 30-60 минути за да го легитимира и да ни ги достави податоците.
Значи комуналниот инспектор мора да има овластувања да легитимира, физички да неутрализира, да приведува, да бара притвор, да изрекува казни и да може времено да одземе возило со кое прекршителот ја обавува оваа недозволена работа (исто како шумската полиција која може да го одзема возилото со кое нелегално се превезува дрва).
Напад на комунален инспектор да се третира како напад на службено овластено лице и драстично зголемување на казните.
4. Сметот, не еднаш дневно (од контејнерите) треба да се подига 2 пати дневно. Одлагање на смет може да се врши само во одредени термини, а не постојано во текот на 24 часа.
5. Сите контејнери треба да одат под земја и да се набават доволно вакви специјални возила.
Ова го зборувам за индивидуалната хигиена, а посебно прашање е колективната хигиена односно метењето на улиците.
Во овој дел Комунлната хигиена и Паркови и Зеленило тотално потрфрлија.
Нај објективен беше поранешниот градоначалник на град Скопје, Трифун Костовски кој рече собирањето на ѓубрето во Скопје е рак рана.
За Скопје откако знам за себе можеме да зборуваме за помалку нечисто или повеќе нечисто, но никогаш не било чисто.
Најдобра работа ќе биде овие претпријатија да се поделат помеѓу општините.
Карпош е општина со највисок процент на наплата на сметките за ѓубретарина и одржување на зеленило кое го прибираат овие јавни претпријатија, а граѓаните не добиваат соодветна услуга.
Постојано се спомнуваат и останатите 10 градоначалници. Општините немаат надлежност за одржување на хигиената и зеленилото бидејќи со законот за град Скопје ова е обврска на Градот преку јавните претпријатија.
Се поставува прашање зошто и ние 10 општини плаќаме хигиеничари, трошиме средства, ја косиме тревата, купуваме опрема?
Затоа што ако ние не помагаме Скопје ќе биде во многу лоша состојба како пред 2000та година.
Оние што велат дека ни се мешале ингеренциите – не е точно. Одржувањето на колективната хигиена, метењето и зеленилото по булеварите до првата собирна улица, сме се договориле да го работи градот Скопје, а внатре блоковскиот дел го одржуваат општините.
Ајде господине министере зафатете се за работа. Вие сте познати по брзо менување на закони, да ги поделиме овие претпријатија на општините и ве уверувам дека ќе се трошат помалку средства, а градот ќе биде почист, по искосен и по зелен.
За вас ова е сега дежурна тема. Можеби да не бевте власт за ова немаше ни да зборувате. Јас ова го зборувам од 2000та година. Истово ова му го предлагав и на градоначалникот Коце Трајановски.
Дури бев подготвен во тоа време мојата општина да купи еден камион за подигање на контејнери. Комунална хигиена да го подига сметот наутро, а тој наш камион оваа работа да ја врши навечер. Но, и градоначалникот на Скопје и тогашниот директор на Комунална Хигиена бараа ние да го купиме ова возило, а они да го користат. Нормално не се сложив зошто знаев што ќе се случи. Ќе работат како што сме се договориле 15 дена а потоа нашиот камион ќе го пратат во некоја друга општина со образложение дека таму имаат хаварисани камиони па мора да пополнуваат.
Сосема за крај, ако ги поделиме овиејавни претпријатија оние општини кои имаат висока наплата на сметките за одржување на хигиената и зеленилото ќе бидат почисти и позелени. А оние кои неѓаат навика на плаќаат и натаму нека им биде дежурна тема ѓубрето и тревата.
Така е праведно и пред народ и пред Господ.
