Од Агенцијата за храна и ветеринарство досега не одговорија што преземаат за да се спречи приливот на кучиња по улиците, колку казни се изречени за нечипирано куче, ниту дали досега се изречени казни за нерегистрирано легло, односно за размножување кучиња и нивна продажба од дома, без никаква контрола. Граѓани со денови реагираат дека во Аеродром се истоварени глутници кучиња, кои за разлика од маалски кучиња се однесуваат агресивно, лаат и ги заплашуваат жителите. Поради тоа, тие апелираат до надлежните итно да најдат решение додека некој не настрадал. На социјалните мрежи се споделува и видео снимено на крстосницата помеѓу улиците Васко Карангелевски и Матеја Матевски. Стравот на жителите е уште поголем затоа што токму на овој потег секојдневно минуваат ученици од основното училиште „Љубен Лапе“. Според нив, треба да реагираат и општинските служби и заловувачите од „Лајка“ за да се обезбеди безбедно движење низ населбата. Според објаснувањата на граѓаните, кучињата се носат со комбиња од други градови, се истовараат доцна навечер најчесто кај хотел „Русија“ и се оставаат исплашени, збунети и дезориентирани на непозната територија, па нормално е што лаат и некогаш се однесуваат агресивно. Поради тоа, како што посочуваат, потребно е и тие да се заловат и да се стерилизираат.
На фејсбук-групата „Општина Аеродром – Граѓанска патрола“ се огласи и општинската инспекторка за заштита на животната средина Елена Ѓошевска Стојановска, која ги информира граѓаните дека Општината веќе пратила допис до Град Скопје и до „Лајка“, притоа објаснувајќи дека кучињата не се надлежност на Општината и дека Општината може само да алармира, да поднесе иницијатива и да бара од „Лајка“ да излезе на терен.
Укажавме на алармантната состојба низ општината со бездомните кучиња особено околу и во училишните дворови. Повикавме веднаш да реагираат и да преземат мерки. Децата се на прво место и никој не смее да им прави стрес на патот до училиште – посочи инспекторката.
Од ЈП „Лајка“ велат дека ќе излезат на терен за да видат за што станува збор, но додаваат дека има сериозен проблем со прилив на кучиња во градот што никој не го контролира. Како што објаснува директорката на претпријатието Радмила Пешева, тие работат во согласност со Законот за благосостојба на животните и се обидуваат да ја намалат популацијата на кучињата по улиците со стерилизација и кастрација, но дека сами не можат да го решат проблемот со бездомните животни затоа што недостасува преземање надлежности на повеќе нивоа.
Општина Аеродром е една од општините која е најмногу покриена, речиси 70 отсто од кучињата се третирани, ојаловени. Има редовно прилив на нови, тоа никој не го контролира. Ние имаме два тима, 30 вработени и едноставно толку е моќта. Многу ќе биде добро општините сами да направат контрола кое домаќинство има куче, да им понудат кастрација. Ние имаме 120 бокса и тие се веќе окупирани со кучиња што ги земаме по налог затоа што биле агресивни и оперативни ни се само 30 бокса за да ја вршиме основната дејност – објаснува Пешева.
Според директорката, кај нас најголем проблем е неодговорното сопствеништво, но и тоа што нема казнување, не се знае кој сѐ има куче, како го чува, вели дека опасни кучиња се пуштаат сами да шетаат по улици и наведе дека, на пример, деновиве биле заловени пет питбули пуштени на улица.
Општините можат да преземат кампања за едукација, можат да дадат субвенции за стерилизација на домашните миленици. Можат со комунални редари да ги потсетуваат граѓаните на нивните законски обврски да го чипираат миленикот, може нивните комунални редари сами да проверуваат дали се чипирани милениците, може сами да купат читачи, нека побараат од Агенцијата за храна и ветеринарство проширување на ингеренциите на комуналните редари. Треба да покажат некоја грижа, да покажат дека некој го следи проблемот – вели директорката на „Лајка“.
Пешева додава дека одговорноста за состојбата секогаш се префрла само на „Лајка“, а тие законски можат само да ги собираат кучињата на улица поради хуман третман, но дека не можат да превенираат или да казнат некого што пушта кучиња на улица. Како што посочува во стационарот има голем број заловени кучиња чии сопственици одбиваат да дојдат и да си ги земат. Чувањето на животни кај нас се регулира со неколку закони и тоа Закон за благосостојба на животните, Закон за регистрација и идентификација и Закон за ветеринарно здравство.
За сите овие закони надлежна е Агенцијата за храна и ветеринарство. Сите пропусти се на нивните инспектори, а граѓаните ѝ праќаат тужби на „Лајка“. Зошто, затоа што сопственици пуштаат кучиња на улици? Од друга страна, АХВ обврската ја префрла на општините, во смисла дека општините треба се грижат за бездомните кучиња, но не им дава вистински ингеренции – истакна Пешева.
Во Скопје има околу 6.000 кучиња и под услов и сите да се згрижат, наредната година како што тврди, ќе се појават уште 1.000 нови сѐ додека не се преземат мерки за контрола на сопствеништвото.
Ние сега на годишно ниво трошиме околу 50 милиони денари само за нашиот капацитет, 1200 кучиња што третираме годишно, а замислете за 6.000. Тоа се јавни пари во недоглед, без идеја за решавање на проблемот – вели директорката.
Од Општина Аеродром побаравме одговор дали Општината на каков било начин се ангажира за справување со проблемот со улични кучиња во Аеродром, освен што очекува тоа да го направи „Лајка“ и дали размислуваат да воведете субвенции за стерилизација и кастрација на домашни миленици, за да се спречи создавање нерегистрирани и незаконски легла по домовите и продажба на кучиња без контрола, но одговор нема. Ниту од Агенцијата за храна и ветеринарство досега не одговорија што преземаат за да се спречи приливот на кучиња по улиците, колку казни се изречени за нечипирано куче, ниту дали досега се изречени казни за нерегистрирано легло, односно за размножување кучиња и нивна продажба од дома, без никаква контрола.
