Советот за оценка на обвинителен акт отфрлил кривична пријава со која се гонеле злоупотреби на државни пари, а кога обвинител од ОЈО Скопје се жалел на таквата одлука, Вишото јавно обвинителство се откажало од жалбата. Од таквото постапување на Вишото јавно обвинителство ќариле обвинетите кои биле гонети за злоупотреба на постапка за јавна набавка или јавно-приватно партнерство, но на крајот биле ослободени.
„Слободен печат“ дознава дека ова е еден од предметите поради кои државниот јавен обвинител врши контрола врз работата на обвинителите, како што има и законска обврска. За предметот постои правосилна судска пресуда од Врховниот суд во која што е констатирано дека кога обвинителот од ОЈО Скопје поднел обвинителен акт, советот за оценка на обвинителен акт при кривичниот суд во Скопје, истиот го одбил ама згрешил односно ги пречекорил своите овластувања и сето тоа било во корист на обвинетите.
„Во конкретниот случај биле приложени бројни материјални и вербални докази, кои Советот за оценка на обвинителен акт недозволено ги анализирал, оценувал и толкувал. Па така, Советот ја ценел содржината на приложените фактури и изготвеното вештачење, по што заклучил дека истите не се однесувале на кривично правниот настан како и дека во случајот не било потребно изготвување на вештачење.
Оттука иако се работи за фаза на постапката кога состојбата на предметот е таква што не може да се утврди со сигурност дали обвинетите го сториле кривичното дело кое им се става на товар, сепак Советот за оценка на обвинителниот акт утврдил дека во случајот немало доволно докази од кои може да се заклучи дека обвинетите го сториле предметното кривично дело“ – пресудил Врховниот суд.
Според Врховниот суд, со таквото постапување Советот за оценка на обвинителен акт ги пречекорил своите овластувања бидејќи не е овластен да цени дали фактите и околностите на кои се заснова обвинението пружаат сигурен доказ дека обвинетите го сториле делото кое им се става на товар, кое нешто ќе се цени во контрадиктрона постапка на расправа од страна на судечки совет. Но, Вишото јавно обвинителство можело да ја санира оваа повреда, што не се случило.
Воедно, овој суд укажува на тоа дека ваквата повреда сторена од страна на Советот за оценка на обвинителен акт можела да биде санирана ако Вишиот јавен обвинител не се откажал од изјавената жалба, се додава во пресудата од Врховен суд која ја поседува „Слободен печат“.Контролата во Вишото јавно обвинителство Скопје ја опфаќа работата на сите јавни обвинители во тоа обвинителство. Државниот јавен обвинител Љупчо Коцевски неодамна изјави дека „обвинителите кои чесно и одговорно си ја вршеле работата немаат ниту реакции, ниту стравувања, бидејќи знаат дека контролата се спроведува согласно закон“.
Од позиција на државен Јавен обвинител имав обврска, првпат после повеќе од четири години да извршам надзор над работата на Вишото јавно обвинителство Скопје, бидејќи до мене дојдоа информации и пресуди од Врховниот суд, кои укажуваат на можно нестручно работење на одредени јавни обвинители, како и пријави за закани, притисоци и недолично однесување кон вработени во обвинителството. Овие пријави се доставени и до Советот на јавните обвинители, наводите се документирани и имам обврска да ги проверам, рече тој. Најавено е дека сите сознанија од извршената контрола ќе бидат објавени по завршување на соодветните постапки предвидени во Законот за јавно обвинителство.
До крајот на овој месец контроли ќе бидат извршени и во сите останати виши јавни обвинителства и во ОЈОГОКК. За сите контроли задолжени се јавните обвинители од републичкото обвинителство распоредени како координатори за соодветните обвинителства со редовен годишен распоред. Според задолженијата, тие ќе треба да го проверат предметното работење на сите јавни обвинители во предметите во кои обвинителите се откажале од жалба или од обвинение. Затоа очекувам нападите кон мене да продолжат со уште поголем интензитет, особено од страна на лица кои со вакви обвинителски одлуки се спасиле од кривичен прогон додека граѓаните очекувале правда, додаде Коцевски.
