Прославата на Денот на албанското знаме, вечерта на 28.11.2024 г. ја откочи спиралата на етничка нетрпеливост откако десетици автомобили „продефилираа“ низ главниот град Скопје не почитувајќи ги сообраќајните правила и исплувајќи повеќе истрели од автоматско огнено оружје. Но, она што уште повеќе ги разгоре страстите беше начинот на кој беа објавени видеа од уништувањето на македонското, а потоа и на албанското знаме во стилот око за око, заб за заб. На сето тоа му претходеа редица коментари со говор на омраза и повици од разни политички фигури за ескалација на состојбата.
Од каде всушност потекнаа видеата
Едно од првите видеа со уништување на знамето се појави на новоотворен ТикТок профил, чиј единствен пост е за палењето на македонското знаме. На профилот нема ништо друго, тој е анонимен. Подоцна друго видео во кое е прикажано како се кине знамето беше споделено од профил на социјалната мрежа X од каде што всушност и го преземаат повеќе медиуми. Нејасно е дали профилот што го објавува видеото лично го има снимено или некој му го испратил.
На истиот профил на Х често можат да се најдат содржини кои имаат потенцијал да предизвикаат етнички тензии и говор на омраза, особено насочени кон Албанците и Бугарите, но не се исклучени ни сексуално вознемирувачки материјали кои што не би биле дозволени на платформи како Инстаграм и Фејсбук. Сопственик на профил со идентично име на Инстаграм, во минатото на повеќе наврати се појавува во медиумите каде вели дека добро заработува од социјалните мрежи, а за себе се претставува како „Единствениот независен медиум во Македонија“. Иако популарните корисници на социјалните мрежи во земјава имаат моќ да обликуваат мислења и ставови, се чини оти не се грижат многу за тоа дали нивните содржини поттикнуваат говор на омраза. А се чини дека за тоа не се грижат многу ниту мејнстрим медиумите кои преземаат содржини од вакви интернет сметки без притоа да ги проверат.
Политичките партии не остаана имуни на коментари
Политичките партии не останаа имуни на настанот и станаа дел од полемиката на социјалните мрежи. Притоа, коментарите на објавите на политичките партии исто така изобилуваа со говор на омраза. Една од овие партии е опозициската Левица, која остро реагираше на уништувањето на македонското знаме. Опозицискиот Социјалдемократски сојуз и ВМРО-ДПМНЕ, која е на власт, исто така имаа соопштенија во кои го осудија сквернавењето на македонското знаме и ги повикаа надлежните институции да ги санкционираат оние кои го кршат законот.
Етничката албанска партија која до неодамна беше во владејачките структури, Демократската унија за интеграција (ДУИ) исто така го осуди палењето на македонското знаме, но во исто време имаше остри зборови за наводната полициска интервенција за време на прославата на Денот на албанското знаме.
Запалено и албанското знаме
Одреден контроверзен националистички профил на социјалните мрежи, кој често се занимава со меѓуетнички прашања вечерта по случувањата и по медиумските објави, постираше видео во кое се пали и албанското знаме. Таквиот чекор додаде масло на огнот и стана уште една провокација која не само што го нарушува меѓуетничкото разбирање, туку и го поттикнува говорот на омраза и насилството. Она што е карактеристично е што речиси ниту еден медиум на македонски јазик не објави за палењето на албанското знаме, а од друга страна многу малку медиуми на албански јазик објавија за палењето на македонското знаме. Ретки беа и медиумите кои, освен што го преземаа видеото, имаа критички осврт на настанот.
