Рацете не прифаќаат да ги пишуваат овие редови… Умот не прифаќа дека ова може да биде вистина…Замина Илија Жупаноски.Еден од ретките, многу ретките личности што зрачеше добрина, мекост, топлина, посветеност… Што да му речеш, тој така ќе ти врати: меко, топло, беспоговорно веднаш да ти помогне, да најде решение…
Сум работел во многу тимови. Такви ми се годините. На многу професионални и други проекти. Биле добри, правеле промени, но сега знам – сите тие најмногу се паметат и се издвојуваат поради некои од луѓето со кои сум работел. Илија е еден од ретките такви луѓе. Се даваше во работата. Ни се даваше на сите нас, а нам ни беше откритие што го запознавме и што имаме привилегија да работиме со него
Со веста дека си замина, дојде и голема и длабока е празнина. Чудно, ама и таа празнина е исполнета со Илија.Велам – Збогум Илија – иако сѐ уште ми е тешко да ја прифатам болната вистина. Премногу рано замина…
—
Илија Жупановски, татко на две мали принцези, сопруг, син, брат, другар, пријател, грижлив, трпелив, професионалец… најдобар!Роден во Скопје во 1982. Заврши средно економско училиште и економски факултет во Скопје, а магистрираше информациски системи на универзитетот Лунд во Шведска.
Беше еден од младинските активисти кои учествуваа во основањето, развојот и професионализацијата на македонската дебатна асоцијација и на Младинскиот образовен форум (МОФ), каде беше и извршен директор од 2007 до 2010 година.
Жупаноски имаше суштински ангажман во демократизацијата на дигиталните комуникации на Владата на Северна Македонија од 2017 година наваму. Беше еден од основачите на концептот за дигитална отчетност и транспарентност кој придонесе македонската Влада од 2017 година да биде прва во регионот по проактивна транспарентност и отчетност.
Беше советник за дигитални комуникации на премиерот Заев, на премиерот Спасовски и на премиерот Ковачевски.Активен борец против дезинформациите и против хибридните и сајбер напади врз демократиите, со огромно домашно, регионално и меѓународно искуство.
Илија беше член и на управниот одбор на European Digital Diplomacy Exchange (EDDE), меѓународна мрежа на владини комуникатори чија цел е зголемување на колективните капацитети за поефикасна заштита на демократиите во рамките на дигиталниот информациски простор.
Илија Бојароски, ФБ пост