Германскиот канцелар во заминување Олаф Шолц денеска изјави дека е „клучно“ Украина да остане „независна, суверена и демократска нација“ која може да го продолжи својот пат кон пристапување во Европската Унија и да има силна војска дури и по мировниот договор со Русија. Шолц додаде дека се надева оти вториот дом на германскиот парламент, Бундесрат, ќе го одобри пакетот за задолжување, така што Германија ќе има „флексибилност да направи сè што треба да направи како главна земја во срцето на Европа“, вклучително и дополнителна помош за Украина, пишува Гардијан.
Шолц истакна дека Европа мора да продолжи да дава силна поддршка за Украина, без оглед на разговорите меѓу Вашингтон и Москва, за да се осигура дека Киев е во силна позиција и дека секој прекин на огнот е одржлив, објави Ројтерс. „Мораме да ја продолжиме нашата поддршка со јасен став дека за Украина мора да биде возможен праведен мир. Тоа значи дека Украина може да ја брани својата независност и суверенитет, дека сама одлучува за својот пат и ги избира своите лидери, и нормално дека има силна армија дури и во мирно време“, рече Шолц. Тој заклучи дека „пакетот мерки за задолжување договорени од веројатната идна коалиција на Германија за финансирање на зголемените трошоци за одбраната и инфраструктурата е клучен дел“ за постигнување на таквите цели.
