Јас сум пријател и со Заев и со Мицкоски, од политиката имав само штета и тоа во милиони евра, народот уште не може да поверува дека некој има цел да помогне дури и на своја штета, вели Анѓушев

Никогаш повеќе нема да се занимавам со политика, изјави во емисијата „Само интервју“, поранешниот вицепремиер и бизнисмен, Кочо Анѓушев откако по повеќе од две и полгодишен ангажман во Владата предводена од СДСМ, се повлече од политиката.

За информациите за негова поврзаност со ВМРО-ДПМНЕ, Анѓушев вели дека тој е стопанственик и дека неговите компании мора да работат за време на владеењето на било која влада.

Комуникација одржувал и со сегашниот премиер, Зоран Заев, но вели дека е пријател и со опозицискиот лидер, Христијан Мицкоски.

-Јас сум пријател со сите. Со Заев се слушаме одвреме навреме, а со Мицкоски сме колеги на факултет седум години, работиме на истиот Институт на Машински факултет и тој е мој пријател и колега, рече Анѓушев.

Тврди дека од неговиот ангажман во Владата немал никаква лична корист, туку неговите компании имале штета, односно за тие две и пол години имале пад на приходите од 18 до 20 отсто. Според него, јавноста не е подготвена да верува дека некој е спремен да даде свој придонес во политиката без да има личен интерес во сето тоа. Во емисијата не кажа колку тежи неговото богатство, туку го заокружи на неколку милиони, кои биле пријавени во Управата за јавни приходи.

-Во Македонија не е тешко да се стане милионер, само треба многу да се работи. Јас сум доктор на науки на Машинскиот факултет и сѐ што работам е поврзано со мојата струка, метална индустрија, енергетика, вели Анѓушев кој тврди дека не се точни наводите дека една третина од хидроцентралите се во негова сопственост. -Бројката е многу помала и во овој бизнис јас сум содружник со „Гранит“, а исплатливоста на хидроелектраните доаѓа по осум-девет години работа, вели Анѓушев.

Link with us
Game bài đổi thưởng