Поради можноста за ескалација на конфликтот меѓу Русија и Украина, американската војска ги повлекува своите сили од украинска територија, кои се распоредени таму за обука на локалните сили

Министерството за одбрана на САД објави дека повлекува 160 членови на својата Национална гарда од Украина и ги преместува на друга локација во Европа.

Портпаролот на Пентагон Џон Кирби изјави дека одлуката е донесена „од претпазливост“, пренесува Ројтерс.

„Прераспоредувањето не значи промена во нашата решеност да ги поддржиме украинските вооружени сили, туку флексибилност во поддршката на сојузниците и одвраќањето на агресијата“,се наведува во писмената изјава на Кирби.

Тој не прецизираше на која локација во Европа ќе бидат префрлени овие лица од Националната гарда. Од 2015 година, резервните сили на Националната гарда на САД ги обучуваат украинските војници заедно со војници од други земји, пред се од Канада и Германија.ж

„Ројтерс“ во петокот објави дека Пентагон испраќа 3.000 дополнителни војници во Полска додека Русите одржуваат воени вежби во соседна Белорусија и Црното Море.

Пентагон, исто така, соопшти дека неговиот министер за одбрана Лојд Остин имал телефонски разговор со рускиот колега Сергеј Шојгу во саботата за да разговара за акумулацијата на руски војници на границата со Украина.

Денеска телефонски разговараа и американскиот државен секретар Антони Блинкен и неговиот руски колега Сергеј Лавров, а телефонската средба меѓу претседателите на двете земји Џо Бајден и Владимир Путин е закажана за подоцна вечерва.

САД предупредуваат на можноста за руска инвазија на Украина следната недела, но Русија ја негира можноста и ги обвинува САД дека ја зголемуваат опасноста од војна со предупредување за руска агресија.