Ружин: Заев ќе остане една важна фигура во политичката историја на Македонија

Поранешниот амбасадор на Македонија во НАТО и универзитетски професор, Нано Ружин истакнува дека поранешниот режим, кој беше на власт 11 години, разви систем на клиентелизам и висока стапка на корупција, по што премиерот Зоран Заев се обидел да го избрише тој клиентелизам.

„Што се однесува до поранешниот градоначалник на Скопје, покрај неговите добри идеи, некако беше тежок за комуникација. Беше затворен во круг, опкружен со луѓе и околу него направи мала тврдина. Освен тоа, не сакам сега да кажам ништо без доказ, но тоа не котира добро во јавното мислење. Го сметаа за вообразен и таков човек кој не може да се справи со луѓето. Имаше и други фактори кои помогнаа Арсовска да победи. Цело време беше насмеана и имаше добра кампања. Таа беше поддржана од различни здруженија на жени. За неа гласаа антиваксерите, за неа гласаше ВМРО-ДПМНЕ“, вели Ружин во изјава за српска „Нова“.

Тој се осврна и на тоа што ВМРО-ДПМНЕ ги доби речиси сите општини во Скопје освен Центар.

„Скопје е речиси една третина од Македонија и ВМРО-ДПМНЕ ги доби сите општини во Скопје освен Центар која традиционално гласа за социјалдемократите. Тоа е општината која најмногу настрада за време на груевизмот, бидејќи таму е тој центар со кич, барок и неокласицизам, каде што имате околу сто споменици без никаков вкус, а тоа не чинеше скоро милијарда евра. Скопјани гласаа за некоја европска вредност, а ако сакам да ги дефинирам денешните избори во Скопје и Македонија, би рекол – Балканот ја победи Европа, Македонија ја победи Северна Македонија. Благодарение на таа Северна Македонија, ни се отворија перспективите за европски и атлантски интеграции, се подобрија добрососедските односи со Грција… Добивме голема поддршка од сите страни“, објаснува Ружин.

Според дипломатот, Заев ќе остане „една важна фигура во политичката историја на Македонија“.

„Знаете како велат, народот и кога ќе погреши во својот избор, секогаш е во право. Така се случи и со Скопје, и тоа реши да ја запечати политичката кариера на Зоран Заев. Иако е прилично млад, тој е храбро момче кое направи многу и кое веројатно ќе остане како една важна личност во политичката историја на Македонија“, заклучува тој.