СТЕВО ЌЕ ИМА СРЕДБА СО ШЕФОТ НА ООН И ЌЕ ПОСЕТИ УНИВЕРЗИТЕТИ ВО САД, ОСМАНИ ЌЕ ВОСПОСТАВИ ДИПЛОМАТСКИ ОДНОСИ СО ФИЛИПИНИ И ЌЕ СЕ СРЕТНЕ СО ВИСОКИ ФУНКЦИОНЕРИ НА САД – ПЕНДАРОВСКИ И ОСМАНИ НА 76-ТА СЕСИЈА НА ГЕНЕРАЛНОТО СОБРАНИЕ ВО ООН ВО ЊУЈОРК НА ТЕМА КОВИД 19

Учество на претседателот Пендаровски на 76. сесија на Генералното собрание на Обединетите нации во Њујорк

Претседателот на Република Северна Македонија, Стево Пендаровски, од денеска – 20 септември 2021 година, понеделник, ќе престојува во работна посета на Соединетите Американски Држави, по повод учеството на 76. сесија на Генералното собрание на Обединетите нации во Њујорк.

Претседателот Пендаровски на 23 септември 2021 година, четврток, ќе се обрати на Генералната дебата на 76. Сесија на Генералното собрание на Обединетите нации, што се одржува на тема „Градење отпорност преку надеж – опоравување од Ковид-19, одржливо обновување, одговор на потребите на планетата, почитување на правата на луѓето и ревитализација на Обединетите нации“.

Во рамки на учеството на Генералното собрание на ОН, предвидено е претседателот Пендаровски да оствари средба со Генералниот секретар на ОН, Антонио Гутереш, како и билатерални средби со шефови на држави и влади, учесници на Генералното собрание.

Претседателот Пендаровски во Њујорк ќе учествува на Виртуелниот глобален самит за борба против Ковид-19: Крај на пандемијата и закрепнување, како и на 20. Состанок на високо ниво во организација на Меѓународниот центар Низами Ганџави на тема „Што значат мирот и стабилноста во 21. век?“.

Во рамки на активностите во Њујорк, предвидено е претседателот Пендаровски да оствари средби со извршната директорка на УНФПА, Наталиа Канем, како и со претставници на дијаспората.

Претседателот Пендаровски ќе оствари средби со претставници на Македонија2025 и со претставници на Американско-еврејскиот комитет во Њујорк.

За време на посетата, претседателот Пендаровски ќе биде придружуван од сопругата, Елизабета Ѓоргиевска, која ќе се обрати на настанот на високо ниво посветен на одбележувањето на 30 години од глобалната 16-дневна кампања против родово-базираното насилство, ќе одржи предавање на Стоматолошкиот факултет при Универзитетот Колумбија и ќе го посети училиштето за деца со посебни потреби Jesse J. Kaplan.

Османи во САД на Генералното собрание на Обединетите нации

Министерот за надворешни работи, Бујар Османи, претстојната недела ќе патува во САД, каде ќе учествува на Генералната дебата на 76. сесија на Генералното собрание на Обединетите нации.

Во рамките на посетата предвидени се средби и со високите претставници на администрацијата на САД, а во Агендата на Османи се повеќе билатерални средби со хомолози од географски подалечни држави.

Во истата насока, предвиден е и посебен настан за воспоставување на дипломатски односи меѓу Северна Македонија и Филипини.

Во рамките на Генералното собрание, Османи ќе учествува и на бројните состаноци на високо ниво, како што е состанокот на Заедницата на демократии, Алијансата за мултилатеризам и на Конференција за поддршка за влегување во сила на Договорот за сеопфатна забрана за нуклеарни тестирања.

Меѓу другите, Османи ќе учествува и на средбата со Генералниот Секретар на ОН, Антонио Гутереш, како и ќе присуствува на обраќањето на Претседателот Стево Пендаровски на Генералната дебата.

Посетата на Министерот на Обединетите нации, ќе се искористи и за натамошно промовирање на заложбите на нашата земја, но и на нашите партнери ЕУ и САД, за поддршка на ефективниот мултилатерализам.