На камери поставени на една од фирмите кои се наоѓаат во индустриската зона „Момин Поток“ се гледа како еден вработен со голем стап брутално тепа куче, а видеото ги разбесне активистите кои се борат за заштита на животните.

„Страотен облик на суровост и изживување врз мирно бездомно животно во фирма во Момин Поток – куче над 20 пати зверски удирано по глава од вработен! Во друштво на четири полнолетни лица, мажи, мирно бездомно куче е удирано со дебело дрво, најкрвнички и со сета сила, без било кој да интервенира додека кучето урлика од болка и не можејќи да избега или се спаси; случај кој ќе останеше невиден доколку не беше евидентиран на камерите за видео надзор“, велат од Анима Мунди.

Од Здружението за заштита на животни, Анима Мунди  велат дека државата мора да ја препознава и најстрого да ја казнува суровоста кон животните.

„Државата мора да ја препознава и најстрого казни суровоста кон животните која е во државите во ЕУ индикатор за насилство врз деца, жени, ранливи категории; показател на сериозна психопатологија“, реагираат од Анима Мунди.

Од Анима Мунди бараат министерот за внатрешни работи Панче Тошковски јавно да се произнесе во врска со случајот.