Почитувана координаторка на Интерпартиската парламентарна група за поддршка на правата на Ромите, г-ѓа Љатифе Шиковска,
Почитувана претседателка на Комитетот за односи меѓу заедниците, г-ѓа Арбана Пашоли,
Почитувани колеги,
Почитувани претставници на невладиниот сектор,
Почитувани екселенции,
Дами и господа
Дозволете во име на пратениците на Собранието на Република Северна Македонија и во мое лично име да упатам честитки за Меѓународниот ден на Ромите, 8 Април. По тој повод, ќе ја искористам приликата и да им посакам на сите граѓани, припадници на ромската заедница, секако и на сите вас присутни тука, да го гледате овој ден како признание и потврда од страна на државата, институциите, вашите сограѓани и општеството во целост тоа дека вие сте неизоставен дел од цел тој мозаик. Бидете живи, здрави, интегрирани и успешни во сето тоа што го правите. Со вашиот придонес и активност, и вие станувате важен чинител во остварувањето на определбата на Република Северна Македонија за полноправно членство во европското семејство, со креирање на општество втемелено на идентични вредности како на Европската унија. Несомнено дека почитувањето на човековите права, еднаквоста, демократијата, владеењето на правото и функционалната пазарна економија за сите граѓани се неопходните предуслови за постигнување на таа цел.
Но, и да не е целта во прашање, како одговорни политичари, и како граѓани, свесни сме дека подобрувањето на квалитетот на животот и посветеноста за изградба на еднакво и кохезивно општество кое што ќе се темели на взаемна доверба, соработка и во кое нашите граѓани и сите заедници ќе се чувствуваат безбедни и ќе имаат еднакви можности за личен развој е единствениот пат кој што ќе го следиме и за кој што веруваме дека ќе вроди со најпозитивните резултати. Убеден сум дека и досега постигнатите резултати од усвоената Национална Стратегија за Ромите 2022–2030 која е дел од јавните политики за изедначување на степенот на вклученост и интеграција на ромската заедница со сите етнички заедници имаат удел во тие резултати.
Се разбира дека треба да се продолжи со инвестирање во таа насока и верувам дека именувањето на националната контакт точка за Ромите е добра основа. Меѓутоа, потребно е да се зајакнат човечките капацитети, и на број, и квалитативно, затоа што тие се погонот кој што го води процесот напред. Потребна е координација и соработка помеѓу сите чинители кои можат да придонесат во подобрување на состојбата. При тоа, мислам на државните институции, централната и локалната власт, невладините организации, образовните, здравствените установи. Секаде каде што се забележува застој, или пак воопшто нема напредување во статусот на овие наши граѓани, а тоа се одразува директно и на нивниот реален живот и опстанок.
Ние не можеме да ги затвориме очите пред нееднаквоста, пред нивното останување надвор од системот. Тоа ќе ни се врати како бумеранг! Ако е добро, треба да биде добро за сите. Само тогаш можеме да одиме напред како држава и како регионален фактор. Искоренувањето на сиромаштијата, гладта, еднаквиот пристап до образование, здравство, социјално згрижување, исти шанси за вработување и напредок во кариерата и за нашите сограѓани Роми ќе биде придонес и во одржливите развојни цели на Организацијата на обединетите нации, како и во делот на унапредување на човековите права.
Почитувани присутни,
Потребно е да се работи многу повеќе во насока на подигнување на граѓанската свест за нашите сограѓани Роми, за да се превенираат и отстранат предрасудите и дискриминација во секоја општествена пора. Сите сме рамноправни граѓани на Република Северна Македонија, имаме исти права и обврски. Тогаш, треба да имаме и исти можности за секој да може да ја искаже својата различност и со тоа ја подобри и збогати социјалната кохезија во земјата. Развојот на ромската заедница ќе даде долгорочни придобивки затоа што со градењето на општество во кое се почитуваат правата и обврските на секој поединец, во линија со Европските и меѓународните стандарди и за правата на маргинализираните групи, уште повеќе ќе се зацврсти нашето мултиетничко демократско општество и уште посилни ќе бидат нашите аргументи за полноправно членство во Европската унија.
Почитувани колеги,
Кога ромската заедница ќе биде целосно интегрирана во општеството, таа сама ќе се погрижи да го отвори патот за подобрување на квалитетот на својот живот. Наша обврска е да бидеме до нив во секој чекор.
Ви благодарам на вниманието!
