Поранешниот градоначалник на Општина Центар, пратеник во Собранието и заменик-министер, Андреј Жерновски, размислува повторно да се активира политички, објави порталот „24 инфо“, откако Жерновски освоил најмногу гласови во анкета за тоа кој бил најдобриот градоначалник на Центар.
„Многу ми значи и ме израдува фактот дека граѓаните на Центар, и покрај тоа што поминаа 12 години од мојот избор за градоначалник на најважната општина и што четири години сум отсутен од јавниот партиско-политички живот, сѐ уште добро се сеќаваат на нашата заедничка соработка, на постигнатите резултати, реализираните проекти и воспоставените трајни вредности. Таа наша искрена врска, која започна преку историската и макотрпно стекната победа, само се потврдува со текот на времето. Доаѓа период кога, по сѐ изгледа, повторно ќе се активирам политички, а во каков облик ќе продолжи конкретната моја соработка со центарци, останува да размислиме и одлучиме заедно, при што финалниот збор ќе го имаат токму тие“, изјави Жерновски за порталот.
