Пред стотици поддржувачи на независната музичка сцена и со куси концертни настапи на неколкуте музички бендови, и на веќе докажани музичари и диџеи се отвори новото онлајн радио и медиумското јадро за независната музичка сцена „Стереолаб“ во КЦ Лабораториум. Синоќа, не беше сам ден на вљубените, беше и означувањето за почеток на радиото, со концертни настапи на 8 македонски музички автори од поновата генерација Глигор Кондовски, Алембик, Јоана, Стој После!, Вагина Корпорејшн, Огнен Златанов, Светлост и Лепи Џони и диџеј сетови на М.И.К и Дарко Јорданов.
„Идејата и иницијативата за Стереолаб произлезе од Мирко Попов и КЦ Лабораториум. Беше неопходен нов градски електронски медиум со дефинирана и квалитетна музичка преференца, која на слушателите ќе им ги доближува современите развојни текови, пред се, од локалната, потоа и од светската сцена. Како долгогодишен радио водител, другар и соработник на Попов, во соработка со Лабораториум, ја продолживме и доразвивме оваа иницијатива на ново градско радио, кое почна да емитува програма од 14 февруари.“, изјави Дарко Јорданов, главниот и одговорен уредник на Стереолаб.
„Стереолаб“ е нов македонски електронски медиум, кој ќе ја промовира современата култура, како двигател на нови идеи и квалитетен јавен простор за различни генерации граѓани. Стереолаб е музичко радио, кое во фокус ја става домашната квалитетна авторска музичка продукција и сцена, а ќе негува и промовира тековни и веќе познати музички тенденции од целиот свет. Онлајн радиото нуди единствена програма, која ќе комуницира со различни генерации слушатели. Фокусот е на младата и средна генерација слушатели, така што и авторите и водителите на различните музички емисии се од оваа возрасна група.
Програмската шема на Стереолаб се состои од дневна информативна програма „Разумен град“, која низ музика ќе промовира информации посветени на актуелните културни настани во градот и земјава и ќе има гостувања на граѓани, кои креираат и промовираат култура во различни јавни сфери поврзани со квалитетното живеење. Една од порелевантните емисии ќе биде „Македонската топ листа“, која има за цел да го трасира патот за новите македонски таленти и да промовира она што е нова, квалитетна и алтернативна домашна музика. Посебна емисија ќе биде посветена на Мирко Попов, во која, водителите, негови блиски пријатели и соработници ќе споделуваат дел од нивната музичка приказна, влијание и музика, која Мирко ја создаваше и почитуваше.
Интеркултуралноста е значаен дел на радиото, кое ќе има програма и на албански јазик, а во соработка со дел од амбасадите во земјава во подготовки се и емисии на француски, германски и италијански јазик. Попладневните и вечерни часови ќе бидат исполнети со авторски емисии, кои ќе третираат посебни музички стилови и емисии кои ќе третираат литература и книжевно издаваштвото, феминизам и родова еднаквост, екологија… Полноќните часови се резервирани за музички листи изработени од соработниците на радиото, а во перспектива е и развој на емисија за класична музика.
