Во моментов претпријатието располага со 10.163 паркинг-места, од нив 1.983 се на затворените јавни паркиралишта со рампи за влез и излез, 7.130 паркинг-места има во зоните, а 1.050 паркинг-места во двете катни гаражи „Беко“ и „26 Јули“. Зонското паркирање и годинава ќе се проширува на нови територии низ Скопје, во обид да се воспостави ред со паркирањето онаму каде сега е хаос и тешко се наоѓа слободно паркинг место. Граѓаните од повеќе населби со години бараат решение за да се спасат од секојдневните нервози и од вртењето низ уличките каде што живеат за да најдат каде да го остават возилото на враќање од работа и да се приберат дома. Со оглед дека станарите што се опфатени во одредена зона имаат одредени привилегии, како што е бесплатно паркирање две возила и шанса побрзо да дојдат до слободно место, голем дел од граѓаните бараат што побрзо да се воведе зонско паркирање и во нивните населби. Но, голем е бројот и на оние што сметаат дека со зонското ништо не се решава туку само се полни касата на „Градски паркинг“, а дека на Скопје му требаат нови паркиралишта и монтажни гаражи, но пред сѐ, кога се планира изградба на нови згради задолжително да се обезбедат и паркинзи за новите станари.
Нови зонски паркиралишта годинава ќе се организираат во неколку општини и тоа во Карпош, Аеродром, Гази Баба, Чаир, Сарај и Кисела Вода. Ова го предвидува програмата за инвестиции на јавното претпријатие за 2025 година, во која се наведува дека претпријатието планира да изгради и катни гаражи на повеќе локации во градот, без да се прецизира каде. На овој начин, кога паркирањето ќе биде организирано во најголем дел од градот, ќе се намали времето потребно за барање слободно место за паркирање, со што ќе се намали загадувањето (помалку залудно испуштени штетни гасови од автомобилите што кружат барајќи слободно паркинг место), ќе се зголеми достапноста како и безбедноста на сообраќајот во мирување на јавните површини наменети за паркирање, велат од претпријатието. Во Општина Карпош, минатата година беше воведено зонско во населбите Карпош 1 и Карпош 2, а сега ќе се прошири и во Карпош 3 и Карпош 4. Паркирањето ќе биде регулирано и од другата страна на Партизанска во оваа општина, поточно во реоните кај Млечен ресторан и кај Министерство за економија.
Зонското кај Млечен ќе го опфати просторот помеѓу улицата Рузвелтова и булеварите Партизански Одреди, Митрополит Теодосија Гологанов и Осми Септември, а во реонот кај Министерство за економија зонското паркирање ќе се протега на просторот помеѓу улиците Рузвелтова, Леринска, Брадфордска и булеварот Митрополит Теодосиј Гологанов. Во Општина Аеродром проширување е предвидено во населбите Мичурин, Реонски Центар и во Ново Лисиче. Во Мичурин ќе се формира подзона Д10 на улицата Симеон Кавракиров на потегот од Транспортен центар до улицата Руди Чајавец. Зонското ќе се шири во Ново Лисиче и во Реонски Центар: Од Општината тврдат дека 75 отсто од жителите биле – за!
Исто така, годинава се планира да се организира сообраќајот во мирување со зонска наплата и во општина Чаир во реонот на Чаирчанка, како и општините Кисела Вода и Сарај. За овие две општини не е наведено кои локации ќе бидат опфатени со зонско паркирање. Во програмата за инвестиции не се наведува колку точно паркинг-места ќе се уредат во овие населби, затоа што, како што велат од „Градски паркинг“, претходно треба да се изработат сообраќајно – технички решение односно проекти за регулирање на сообраќајот за сите реони што ќе бидат опфатени со зонско. Во моментов претпријатието располага со 10.163 паркинг-места, од нив 1.983 се на затворените јавни паркиралишта со рампи за влез и излез, 7.130 паркинг-места има во зоните, а 1.050 паркинг-места во двете катни гаражи „Беко“ и „26 Јули“. Вкупна вредност на програмата за инвестиции за 2025 година на „Градски паркинг“ изнесува 89.600.000 денари без пресметан ДДВ. Интересно е дека сите инвестиции претпријатието планира да ги покрие со сопствени средства од кои најголемиот дел ги обезбедува од наплата за паркирање и од Пајак-службата.
