Непосредно откако на власт лани дојде ВМРО-ДПМНЕ и коалицијата „Вреди“ во Здравствениот дом Ресен почнале кадровски рокади на медицинскиот персонал кои директорот доктор Јаким Стојчевски ги смета за вообичаена работа. Главната медицинска сестра во Здравствениот дом Ресен Љубица Петковска, која што е единствената во установата што има факултет за медицинска сестра со 240 кредити, наместо да биде унапредена и финансиски наградена за образованието што дополнително го стекнала, добила законски поткрепено деградирање кое ја удрило и по џебот и по здравјето. Од главна медицинска сестра во Здравствениот дом Ресен, со коефициент на плата 3,66 и можности за дежурства кои носат дополнителен приход важен за оваа самохрана мајка, таа е преместена да биде радиолошки технолог, каде се бара образование од 180 кредити и каде никогаш не работела во животот. Точно е дека Петковска е дипломиран радиолошки технолог, но од првиот ден откако била преземена во Здравствениот дом Ресен работи како медицинска сестра, а едно време била и главна медицинска сестра. Тоа завршило кога се сменила власта, тврди Петковска за „Слободен печат“. Страшно ја погодило не само тоа што е преместена на работно место каде де факто не поминала ни ден, туку и тоа што нејзината љубов е да биде медицинска сестра и за тоа вложувала и во високо образование. Во ковид пандемијата доброволно се вратила на работа како медицинска сестра во итната помош, и покрај тоа што била ослободена од работа како самохран родител на дете помало од 10 години.
Кога се случи земјотресот во Турција била единствената од Ресен избрана да замине на терен да се грижи за повредените во руините, но се откажала потребата за медицински кадар од Македонија. -Ми ги зедоа од рака шприцот, иглата и езмархот. Дали е во ред да му се крати платата на вработен со највисока стручна спрема како сестра и да бидам пратена на рентген каде немам работено ни ден? На почетокот само молев да сум во итната медицинска помош, затоа што тоа го работам од срце но и затоа што ми значат парите од дежурствата како самохрана мајка. Како главна сестра секогаш несебично работев и во итната помош. Имам сертификати и никогаш не правев партиски или верски поделби. И со што јас ова го заслужив и за што учев и специјализирав и вложив толку труд за сестра? Наместо да сум наградена јас езмарх немам фатено 6 месеци. Јас навистина сум активист во СДСМ но тоа е кога сум внатре во партијата. Надвор и на работното место мене ми беа сите исти – и вработените а за пациентите да не правам ни муабет. Никогаш не сум гледала партиски, никогаш, изјави Петковска за „Слободен печат“. Директорот на Здравствен дом Ресен, доктор Јаким Стојчевски запрашан зошто токму по промената на власта Петковска била разрешена од главна сестра ни рече: -Секаде се сменети главните медицински сестри. Именуваниот раководител си прави нова екипа, редовна постапка е тоа. Петковска се врати на позицијата од каде што дојде пред да биде главна медицинска сестра. Образложението на работодавачот е дека Петковска според решението што го имала пред да биде главна медицинска сестра – всушност била радиолошки технолог со 180 кредити. Но таа вели дека тоа било само на хартија, а во реалноста од 2017 година откако работи во овој здравствен дом, секогаш била или медицинска сестра со средно образование, или главна медицинска сестра.-Таа е дипломиран радиолошки техничар со висока медицинска школа и работи во одделот за радиодијагностика. Таму имаме 4 места според систематизацијата, но само две се пополнети а Петковска е третата. Така што, единствената со образование радиолошки технолог е таа во Здравствениот дом. Ние месечно имаме меѓу 300 и 400 иследувања и потребен ни е кадар како неа во одделението за рентген. Таму има други бенефиции: скратено работно време, бенифициран стаж, но таа сака да биде во итната медицинска помош а да има решение во рентген за да може да има дежурства. Немаме систематизирано место и не можам да ѝ ја признаам специјализацијата за медицинска сестра, а и немаме потреба од такво работно место. Користи боледување во моментов, ни рече директорот, доктор Стојчевски.
Инаку Петковска вели дека тоа што не ја признаваат за специјализирана медицинска сестра поради немање систематизизрано место во здравствениот дом, на други места се решава лесно – ако се сака. Со адвокат спрема управна тужба зашто смета дека незаконски е распределена на работно место со понизок коефициент и плата и покрај тоа што за разлика од други медицински сестри, ги има стекнато сите сертификати за итна медицинска помош. -Во други болници, каде што се сака, додека да се направи систематизирано место, се плаќа додатокот во исплатно ливче. Но овде не постои волја. Третиот радиолошки технолог си даде отказ во декември, а мене од главна сестра ме разрешија 6 месеци претходно. Во тоа време јас не бев радиолошки технолог, туку патронажна сестра, тврди таа. После два приговори до државната комисија за одлучување во управна постапка и постапка од работен однос во втор степен, наредно со адвокат таа спрема тужба пред управниот суд. Првиот приговор ѝ бил за разрешувањето од главна медицинска сестра кое било без работодавачот да наведе зошто го прави тоа и на кое работно место ја упатува после разрешувањето. Вториот приговор ѝ бил за упатувањето на позицијата радиолошк технолог. Двата приговори се усвоени од комисијата, но исходот е ист – таа не може да се врати на старата плата и на позицијата медицинска сестра. Во најновото решение со кое Здравствениот дом Ресен ја прераспределува да биде радиолошки технолог, здравствената установа во ист документ наведува ем дека „таа е единствената што не работи во рентген дијагностика“ (нема искуство н.з), ем дека „нејзиното знаење и искуство согласно стручната подготовка за радиолошки технолог ќе биде искористено“ со распределувањето. -Откако почнав да работам со договор на дело во 2002 до 2007 година бев медицинска сестра во брзата помош. Во 2008 година добив решение на неопределено во ургентниот центар во Куманово повторно како медицинска сестра. Во 2017 се префрлив во здравствен дом Ресен со превземање во брзата помош. Во 2021 година дипломирав за радиолошки технолог и запишав втор циклус стручни студии за специјализирана сестра. Во 2023 кога ми ја признаа дипломата за радиолошки технолог јас добив решение за рентген, но продолжив да работам во брзата помош поради моето искуство како сестра и положени сите сертификати за итна медицинска помош. Во 2023 дипломирав за специјализирана медицинска сестра и се стекнав со 240 кредити. После тоа ме назначија од 1 јануари 2024 за главна сестра со решение на неопределено време. Никогаш не сум работела како радиолошки технолог, изјави Петковска за „Слободен печат“. Нејзините битки ќе ги продолжи во судница затоа што смета дека образованието треба да ѝ биде вреднувано, наместо да ѝ се намали коефициентот од 3,6 на 3,2 што влијае врз платата. Здравствениот дом Ресен останува на тоа дека Петковска треба да работи како радиолошки технолог а нејзиното работење како патронажна сестра било времено, поради недостиг на кадар и тоа на нејзина молба.
