Соопштението на Курдската работничка партија (ПКК) доаѓа во контекст на фундаментални промени во регионот, вклучувајќи ја прераспределбата на моќта во соседна Сирија по соборувањето на претседателот Башар Асад, ослабувањето на милитантното движење Хезболах во Либан и војната меѓу Израел и Хамас во Газа. Курдските милитанти, кои водат 40-годишен бунт во Турција, денес прогласија прекин на огнот, што би можело да претставува значителен поттик за владата на претседателот Реџеп Таип Ердоган, два дена откако нивниот затворен лидер повика групата да го положи оружјето, пренесува Асошиејтед Прес. Соопштението на Курдската работничка партија (ПКК) доаѓа во контекст на фундаментални промени во регионот, вклучувајќи ја прераспределбата на моќта во соседна Сирија по соборувањето на претседателот Башар Асад, ослабувањето на милитантното движење Хезболах во Либан и војната меѓу Израел и Хамас во Газа.
Декларацијата на ПКК беше објавена од новинската агенција Firat, медиум близок до групата, во саботата. Во неа се споменува лидерот на бунтовниците, Абдула Оџалан, кој е затворен во Турција од 1999 година. „Прогласуваме прекин на огнот што стапува на сила денес за да го отвори патот за спроведување на повикот на Лидер Апо за мир и демократско општество. Ниту една од нашите сили нема да преземе вооружени акции освен ако не биде нападната“, се вели во соопштението, во кое Оџалан е наречен по неговиот прекар. Во четвртокот, делегација на курдски политичари го објави повикот на Оџалан за ПКК да го положи оружјето и да се распушти, откако истиот ден го посетија во неговиот затвор на островот. Конфликтот меѓу Турција и ПКК, кој започна во 1984 година, досега однесе десетици илјади животи. Овој прекин на огнот е првиот знак на напредок откако мировните преговори меѓу ПКК и Анкара пропаднаа во летото 2015 година.
Во своето соопштение, извршниот комитет на ПКК изјави дека повикот на Оџалан означува дека „започнува нов историски процес во Курдистан и Блискиот Исток.“ Терминот Курдистан се однесува на деловите од Турција, Ирак, Сирија и Иран населени со Курди. Повикот на Оџалан дојде во време кога главната прокурдска политичка партија во Турција се соочува со зголемен притисок, при што неколку нејзини градоначалници беа сменети и заменети со владини поставеници. ПКК, исто така, повика Оџалан да биде ослободен од затворот Имрали, кој се наоѓа во Мраморното Море, за да може „лично да води и спроведе“ партиски конгрес што би довел до разоружување на милитантите. Ердоган изјави дека пораката на Оџалан претставува „нова фаза“ во мировните напори во Турција. „Постои можност да се направи исторички чекор кон рушење на ѕидот на теророт што стои помеѓу илјадагодишното братство на турскиот и курдскиот народ,“ изјави Ердоган во петокот.
Некои веруваат дека главната цел на процесот на помирување е турската влада да ја придобие поддршката на Курдите за нов устав, кој би му овозможил на Ердоган да остане на власт и по 2028 година, кога му завршува мандатот. Бахчели отворено повика на нов устав, истакнувајќи дека тоа е клучно за иднината на Турција и за останување на Ердоган на власт. Според извештаите, Ердоган и Бахчели бараат парламентарна поддршка од прокурдската Партија за народна еднаквост и демократија (ДЕМ). Извор: Новинска агенција МЕТА
