Голема норвешка нафтена компанија Haltbakk Bunkers објави дека повеќе нема да доставува гориво за американските сили, вклучително и подморниците на американската морнарица што се закотвуваат во норвешките пристаништа. Одлуката е одговор на неодамнешниот судир меѓу американскиот претседател Доналд Трамп и украинскиот претседател Володимир Зеленски во Белата куќа. „Нема гориво за Американците“ Компанијата на социјалните мрежи објави дека престанува да доставува гориво за американските сили и ја придружуваше својата одлука со пораката: „Нема гориво за Американците!“ „Денес бевме сведоци на најголемиот циркус што некогаш бил прикажан „во живо на телевизија“ од актуелниот американски претседател и неговиот потпретседател. Голема почит до претседателот на Украина што се воздржа и остана смирен, иако САД приредија телевизиско шоу на предавство.
„Нема гориво за Американците! Ги повикуваме сите Норвежани и Европејци да го следат нашиот пример. Слава на Украина!“ тие на крајот додадоа „Одлуката е во сила додека Трамп е претседател“. Сопственикот на компанијата Гунар Гран изјави за норвешкиот поморски портал Kystens Næringsliv дека забраната за снабдување на американските сили нема да биде укината додека Трамп не ја напушти функцијата. „Како што веројатно разбирате, ниту еден литар гориво нема да биде испорачан додека Трамп не си замине“, рече Гран, додавајќи дека неговата компанија, како приватно претпријатие, има право да ги избира своите клиенти. Гран, исто така, истакна дека Халтбак Бункерс претходно ги прекина испораките на руските бродови по почетокот на инвазијата на Украина. „Ова им донесе дополнителен приход на нашите конкуренти, додека изгубивме значителен приход. Но, имаме морален компас. Сега, поради нивното однесување кон Украинците, Американците исто така се исклучени“.
Забраната стапува на сила веднаш и се однесува на сите американски бродови кои пристигнуваат во норвешките пристаништа. Историска кавга. Вчерашната средба меѓу американскиот претседател Доналд Трамп и украинскиот претседател Володимир Зеленски во Белата куќа заврши со тензична конфронтација. За време на состанокот, Трамп го обвини Зеленски дека несовесно ја загрозува глобалната безбедност со тоа што одбива да преговара за мировен договор со Русија. Американскиот потпретседател Џеј-Ди Венс, исто така, го критикуваше Зеленски за, како што рече, недостаток на благодарност и почит за време на состанокот. Конфликтот предизвика глобална дебата и ги потресе американско-украинските односи. Каква компанија е ова? Haltbakk Bunkers е норвешка нафтена и бродска компанија која доставува гориво долж целиот норвешки брег. Покрај гориво, компанијата нуди и лубриканти, детергенти, средства за дезинфекција за аквакултура и средства за разградување на истуреното масло.
