Јавноста се крена на нозе, откако на вчерашната седница за пратенички прашања министерката ја навреди пратеничката Славјанка Петровска дека нема право да прашува за потрошувачката кошничка зашто „нема деца, па не знае колку литри млеко месечно се потребни“. СДСМ ќе почека на оставката од министерката за финансии Гордана Димитриеска-Кочоска за навреда на пратеничката Славјанка Петровска, зашто министерката е фокусирана на својата работа и за неа таа тема е затворена, бидејќи, според неа, не ја навредила пратеничката од опозицијата. И додека СДСМ најави дека ќе бара итна седница на Комисијата за дискриминација и дека ќе протестира додека министерката не се повлече од функцијата, Димитриеска-Кочоска не ѝ се извини на Петровска, не размислува да даде оставка, но повика секој да си ги бара правата за да се види кој бил, а кој не бил во право и кој се трудел да дефокусира. Претседателот на Собранието Африм Гаши ѝ порача на Владата да внимава како се однесува со пратениците и рече дека политичките ставови може да се искажат и без меѓу себе да се навредуваат. Јавноста се крена на нозе, откако на завчерашната седница за пратенички прашања министерката ја навреди пратеничката дека таа нема право да прашува за потрошувачката кошничка зашто нема деца, па не знае колку литри млеко месечно се потребни и дали е поевтино да се јаде замрзнат или грашок од конзерва.
СДСМ на прес-конференција пред Министерството за финансии побара оставка од министерката.
– Кога министерка во оваа држава ќе се осмели да каже дека една жена не може да зборува за семејството само затоа што нема деца, тогаш тоа не е само навреда. Тоа е удар врз достоинството на сите нас, тоа е ароганција, тоа е дискриминација, тоа е нечовечност. Наместо извинување и признание на грешката, Кочоска и ДПМНЕ продолжија со нападите врз Славјанка Петровска. Наместо да покажат барем трошка почит и човечки да се извинат, тие одлучија да ја нападнат Славјанка, уште повеќе, ја обвинија дека глуми жртва – рече пратеничката Јована Тренчевска.
Според социјалдемократите, ВМРО-ДПМНЕ и министерката не ги разбираат вредностите на современото општество и болката од ваквиот однос, не признаваат грешка, бегаат од одговорност и вината ја бараат кај жртвата наместо кај сторителот.
– Гордана Кочоска мора да си поднесе оставка. Министерка која понижува граѓанка на оваа држава, која навредува пратеничка, која шири дискириминација, не заслужува да води министерство, не заслужува да седи во Влада која тврди дека работи за граѓаните. Оставка ќе бараме секој ден додека не си оди од функцијата – рече Тренчевска.
Тренчевска ја обвини потпретседателката на Собранието, Весна Бендевска, дека не реагирала, иако до неодамна била претседателка на Комисијата за спречување и заштита од дискриминација.
– Бендевска не кажа ниту збор, ниту реагираше – рече Тренчевска.
Таа најави дека СДСМ ќе побара итна седница на Комисијата за дискриминација, со цел да расправа за однесувањето на Кочоска и за поширокиот проблем на дискриминација во институции врз основа на полова припадност. Исто така, ќе иницираат законски измени или кодекс што ќе ги санкционира дискриминаторските навреди и говорот на омраза во институциите, особено од високи функционери.
Министерката, пак, очекува темата да се затвори зашто веќе изразила жалење, но не до Петровска, туку за целиот контекст и смета дека пратеничката изигрува жртва. Димитриеска-Кочоска се чувствува навредена.
– И самите сте свесни дека народот има поважни теми од лажната тема која ја создаваат за дефокус. Немам никогаш намера да навредам никого, напротив и таа самата го знае тоа, ама вака и чини сега да изигрува жртва. Им требаше време да размислат, да се координираат и да дефокусираат. Но, повторувам, ниедна туѓа навреда кон мене нема да ме вовлече да навредувам и да возвраќам со навреда. Ова ќе помине и за мене е најважно да останеме луѓе и да помагаме на луѓето колку што можеме. За мене темата е затворена – рече Димитриеска-Кочоска.
Таа додаде дека се фокусира на работата и дека токму тоа му пречи на СДСМ. Не исклучува опозицијата да продолжи со напади кон неа и потсети дека е предмет на лажни изјави и соопштенија на социјалните медиуми, но дека во ниту еден момент не се пожалила.
– Ги повикувам да си ги искористат своите права, па да видиме кој бил, а кој не бил во право и кој се трудел да дефокусира или да користи злоупотреби и лажна терминологија – рече
Кочоска.
Гаши: Владата да биде внимателна кон пратениците
Претседателот на Собранието порача министрите да внимаваат како се однесуваат кон пратениците и дека министрите на седницата за пратенички прашања знаат дека доаѓаат да одговараат на пратениците.
– Кога се случуваат пратенички прашања, треба министрите и Владата да знаат дека доаѓаат да одговараат на пратенички прашања и треба да се почитува какви ингеренции има секоја институција. Собранието има надзорна функција врз Владата, пратеничките прашања се алатка за постигнување на тој ефект и мислам дека особено Владата треба да биде внимателна во Собранието како се однесува кон пратениците – рече Гаши.
Тој додаде дека како претседател на Собранието секогаш повикува на подигнување на политичката култура, однесувањето и на почитување на етичкитот кодекс помеѓу пратениците.
– Сите пратеници мора да се грижиме за достоинството на Собранието, а тоа се прави првенствено преку почитување на едни спрема други. Можеме да ги искажуваме нашите политички ставови без да навредиме никого. Веќе разговараме и за донесување на нов етички кодекс, мислам дека ќе работиме сите на надградба и зголемување на политичката култура. Ваквите настани не се мили, не е добро за Собранието, тоа не зборува добро за нас. Се надевам дека вакви инциденти нема да се повторат – рече Гаши.
Митева: Одговорот на министерката не беше насочен кон лична навреда
Во одбрана на министерката застана портпаролката на Владата Марија Митева. Таа во гостување на „24 анализа“ рече дека одговорот на министерката во Собранието не бил насочен кон лична навреда или штета кон пратеничката Славјанка Петровска.
„Јас, исто така, немам деца, јадам грашок и точно знам како се движат цените во маркетите. Верувајте ми дека никогаш не би си дозволила, како жена која што секогаш во политиката ги критикувала навредите што се случувале, да не искритикувам доколку станува збор за лична навреда со интенција. Во овој случај, одговорно тврдам дека, бидејќи бев таму, немаше интенција за навреда – вели Митева.
Пратеничката Петровска најави дека ќе поднесе претставка до КЗСД, бидејќи министерката упатила лични напади кон неа. Таа смета дека намерата била да биде омаловажена затоа што нема деца и семејство. Зад пратеничката застанаа сопартијците од СДСМ, но и претставници од невладините, како и граѓани кои реагираа на социјалните мрежи на зборовите на министерката „врз основа на што вие во уста ги ставате мајките што имаат деца и како знаете вие едно повеќечлено семејство колку треба да троши. Јас сум мајка на два сина“.
– Со тоа нѐ навредивте сите нас кои од икс-причини немаме деца, ги навредивте сите кои немаат деца, ама се грижат и готват за своите родители, им плукнавте во лице на сите жени кои отстапуваат од вашата замисла за просечно македонско семејство, иако, со оглед на вашите приходи, далеку сте пред нив во однос на финансиската стабилност. И должите извинување на секоја од нас – коментираат дел од граѓаните на профилот на министерката на Фејсбук.
Лидерот на СДСМ Венко Филипче рече дека е шокиран од навредата што министерката за финансии ја упатила кон Петровска.
– Нејзината дрска и понижувачка изјава – дека Петровска не може да знае колку троши едно четиричлено семејство затоа што нема деца ме згрози. Наместо аргументи и дебата во Собранието, сведочиме на лични дискредитации што е добро познат начин на одбрана на ВМРО-ДПМНЕ – смета Филипче.
Пратеникот на СДСМ Фатмир Битиќи порача дека нема да молчи пред дискриминацијата.
– Пратеничката Славјанка Петровска денес беше мета на срамна дискриминација и навредлив став од министерката за финансии, Гордана Димитриеска-Кочоска. Ова не беше само личен напад, туку атак врз достоинството на сите жени, врз правото на секој избран претставник и претставничка да зборува без да биде понижувана – вели Битиќи.
Координаторот на пратеничката група на СДСМ Оливер Спасовски побара министерката јавно да ѝ се извини на пратеничката, а СДСМ и Форумот на жени на партијата најостро ја осудија „срамната, навредувачка и дискриминаторска изјава“.
Осуда и од Левица
Навредата кон пратеничката ја осудија и од Левица.
– Ова е крајната нечовечна, мизогина и одвратна политичка култура на власта, која секојдневно ја сведочиме, со гнасни шиканирања. Новата власт на ДПМНЕ и тоа како ја удрило политичката моќ и ароганција, без ниту една година на власт. Како член на Комисијата за еднакви можности на жените и мажите и Клубот на пратенички, очекувам јавна осуда од сите партии за ваквиот говор на министерката. Во спротивно, воопшто не сметам дека треба да сум дел од тела кои само формално постојат на хартија и во истите не планирам да учествувам – истакна пратеничката на Левица Јована Мојсоска.
