2 март 2025, Скопје – Владата води многу внимателна политика во насока на контролирање на трошоците, на буџетскиот дефицит и јавниот долг и таа заложба се покажа преку намалување на државниот долг, а соодветно на тоа и на јавниот долг, ова го истакна министерката за финансии Гордана Димитриеска-Кочоска која соопшти дека нивото на јавниот долг на крајот на 2024 година изнесуваше 61,9% и дека тој на крајот на јануари изнесува 58,2% од БДП.
„Тоа се должи на раздолжувањето на еврообврзницата со заемот којшто го зедовме и со кој направивме годишна заштеда од 15 милиони евра, односно за двете транши 30 милиони евра. Тоа ја покажува нашата заложба која е во насока на контролирање на трошоците, на буџетскиот дефицит и јавниот долг и верувам дека до крајот на годината многу ќе внимаваме“, рече министерката во гостување во Дневникот на ТВ Сител. Таа додаде дека и Мисијата на Меѓународниот монетарен фонд, која беше во земјава во изминатиот период, ги нотирала напорите кои ги вложува Владата со цел да се контролираат трошоците, иако констатирала дека Владата има наследено многу проблеми од претходно, потврдени со тоа што Македонија е единствена земја во регионот која не успеала да се консолидира во однос на буџетскиот дефицит и јавниот долг. Во врска со прашањето за растот на минималната плата рече дека решениеето што ќе го договарат работниците и работодавачите за раст на минималната плата кое ќе се темели на продуктивноста и исплата на договорениот износ согласно законските обврски Владата ќе го поздрави и ќе го почитува.
„На изборите пред нецела година настапивме со изборна програма во која ги кажавме нашите ставови во однос на даночните стапки и придонеси и по тоа прашање нема да има промена.Како ќе се договорат меѓусебе работниците и работодавачите во рамки на Економско социјалниот совет, каде има претставници и од едните и од другите, ние како држава ќе го прифатиме тоа што ќе се договорат. Платата треба да биде заснована на продуктивност и доколку одговара тој износ што го договараат ние апсолутно ќе го поздравиме тоа. Односно, доколку смета едната страна дека може да испорача продуктивност на она што ќе го договорат како минимална плата и другата страна дека ќе може да го исплати согласно законските обврски кои никогаш не сме рекле дека ќе ги менуваме, тоа ќе го поздравиме и ќе продолжиме да го почитуваме, рече министерката за финансии и додаде дека во администрацијата многу мал дел од вработените е врзан со минимална плата, најголем процент е над износот на минималната плата.
Во однос на пензиите, наведе дека пензионерите со пензиите што ќе бидат исплатени на 1 април ќе го добијат зголемувањето од 2.500 денари што беше ветено и дека со тоа се исправа една неправда којашто беше направена со политиките што се спроведуваа во претходниот период, а потоа ќе се врати старата методлогија, бидејќи, како што рече, во овој момент нема измени на Законот за да кажам дека ќе ја менуваме. Во однос на мерките кои Владата ги презеде за сузбивање на инфалцијата, наведе дека очекува да дадат ефект на краток рок и оти се подготвуваат некои решенија во делот на земјоделството кои треба да имаат влијание на долг рок. За случајот со пратеничката Славјанка Петровска, повтори дека тој е затворен и оти во конкретната ситуација немало навреда.
Со почит, Одделение за односи со јавност, Mинистерство за финансии
