Во вечерашното издание на емисијата „Топ Тема“ на „Телма“, гостуваше пратеникот од редовите на ВМРО-ДПМНЕ, Бојан Стојаноски, кој во фокусот ја стави темата за минималната плата, за дијалогот што се води на Економско-социјалниот совет, притоа ги наведе и мерките предложени од страна на опозицијата, за кои рече дека „се повторуваат“ дека не можат да се спроведат. „Нема да го прифатиме законското решение на опозицијата, бидејќи ако идеме прво по тоа кој го предлага, видете ги само ликовите коишто се во економскиот тим на СДСМ и кој ги промовира економските сегашни политики на СДСМ, тоа не се луѓе коишто се сега нови на политичката сцена, со свежи идеи, туку се истите луѓе коишто ја донесоа Република Македонија до таа економска состојба и практично и ова е уште едно од низата на промашени и неимплементирачки мерки, Кочо Анѓушев овој сега што е на црната листа, ја промовираше оваа мерка и од тогаш почна таа спирала на покачување на инфлација“, рече Стојаноски.
Тој вели дека опозицијата треба да биде сериозна кога станува збор за законски решенија, „а не само да ветуваат и притоа да не го исполнуваат ветеното“. „Значи, треба да бидеме сериозни кога нудиме некои законски решениј,а исто тоа и со ДДВ беше, вие го покачивте ДДВ-то на електричната енергија од 5% на 10%, па на 18% видовме зошто, пола раководство сега во моментот е во притвор, другите се во бегство, додека за храната вие бевте тие коишто го покачивте од 5% на 10%, така што во таа рамка им се движат ветувањата и нивните предлози“, рече Стојаноски. Во емисијата пратеникот наведе дека се што ќе договорат работниците и работодавците на Економско-социјалниот совет ќе се прифати, затоа што тој тоа го смета како најсоодветно демократско решение.
„Секогаш кога разговараме за минимална плата, колку и да ја направиме минималната плата, бидејќи таа се регулира со закон по формула којшто е договорен во 2022 година, потврдена со општ колективен договор, којшто не сум го потпишал јас, го потпишале тие коишто сега бараат и надвор од формулата да се излезе, треба да биде исплатена бидејќи секој што зема минимална плата треба реално таа плата да ја прими. Ние во нашата политичка програма со којашто победивме на изборите, регулирана е политиката и за даноците и за придонесите и тоа за нас е затворено. Има закон којшто ја регулира минималната плата и ние велиме во тој Економско-социјален совет, каде што дијалогот сè уште трае, ние велиме нека се договорат работодавците и работниците, ако едните се сигурни дека можат да ја испорачаат продуктивноста а другите можат да го издржат тоа и да го платат, тогаш ние како држава ќе прифатиме, за нас е прифатливо се што ќе се договорат тие две организации, на таа маса на којашто седат, мислам дека е тоа демократско исправно решение“, вели Стојаноски.
