Новинар кој известуваше за серија убиства во еквадорски град потресен од насилството на наркобандите, беше убиен во заседа, објавија организациите за слобода на печатот. Патрисио Агилар (54) беше убиен во вторникот во куќа во Фундо Лимон, населба опустошена од насилство, во градот Кинди, објавија Репортери без граници (РСФ). „Сторителите „повеќепати пукаа во новинарот, оставајќи најмалку 27 чаури на местото на злосторството“, се вели во соопштението на невладината организација. Бил директор на локалниот весник El Libertador de Quinindé, во провинцијата Есмералдас, која граничи со Колумбија, земја каде што се произведува најголема количина на кокаин во светот. Земја со доларилизирана економија и стратешки важни пристаништа во Тихиот Океан, Еквадор, во последниве години стана центар за трговија со дрога на пазарите во САД, земја со најголема потрошувачка на кокаин во светот. РСФ забележува дека Агилар, новинар со 30-годишно искуство, постојано добивал закани поради неговите написи за феноменот на насилство во провинцијата Есмералдас, каде што во средата беа извршени најмалку пет убиства. Пред неговото убиство, тој покриваше инцидент со пукање во Фундо Лимон и сподели слики од наводните извршители на грабеж во продавница на социјалните мрежи.
Како и РСФ, регионалната организација за одбрана на слободата на печатот, Фундамедиос повика на темелна и целосна истрага за случајот.
„Убиството на Патрисио Агилар е сериозен напад врз слободата на печатот во Еквадор. Неговата работа, разоткривање на организираниот криминал и политичката корупција, го доведе во опасност, но властите не беа во можност да го заштитат“, коментира Артур Хомеу, директор на одделот за Латинска Америка на РСФ. Невладината организација Periodistas Sin Cadenas (Новинари без синџири) истакна дека ова е прво убиство на новинар во Еквадор од 2022 година, кога беа убиени тројца медиумски професионалци. Според властите, во Еквадор дејствуваат околу 20 банди, главно ангажирани во трговија со дрога, киднапирања и изнуда. Стапката на убиства вртоглаво порасна во последните години, од 6 на 100.000 жители во 2018 година на 47 во 2023 година на улиците и ги опиша бандите како „терористички“ организации.
