Во 2019 година, официјалното соопштение од интернационалниот центар за антропозофска медицина и на Интернационалната федерација на антропозофски медицински здруженија, јасно наведува дека тие не го поддржуваат антивакциналното движење. Не навлегувајќи во религиозните и спиритуалните верувања изнесени во објавата што ја рецензираме, оценуваме дека делот во кој се тврди дека „вакцините се за разболување и депопулација“ е невистинит. Нема докази дека вакцините „духовно го отепуваат“ оној што ги прима како што невистинито се наведува во објавата. Милиони религиозни луѓе во светот и такви што се посветени на духовноста, се вакцинирани. Во земјава за време на ковид пандемијата и католичката црква и ИВЗ и МПЦ препорачаа вакцинирање, пренесувам текст во целост од Вистиномер. Рецензираме објава на социјалната мрежа Фејсбук во која се споделува видео материјал и пишува: Вакцинациите не се само за депопулација и разболување на луѓето, туку и за духовно отепување на пошироката јавност како што објасни Рудолф Штајнер. Во видео материјалот се изнесени следните ставови атрибуирани на Штајнер:
Од друга страна духовите на темнината се меѓу нас. Мора да се чуваме за да сфатиме што се случува кога ќе ги сретнеме и да добиеме вистинска идеја каде се наоѓаат тие. Најопасното нешто што може да го направите во блиската иднина е да се предадете несвесно на влијанијата што се дефинитивно присутни. Зашто нема разлика за нивната реалност, дали се препознаени или не. Најголемата грижа на овие духови на темнината ќе биде да донесат конфузија кај правичните елементи што се шират на Земјата и треба да се шират за духовите на светлината да продолжат да бидат активни во нив. Ќе сакаат да ги поттурнат во погрешен правец. Веќе зборував за еден таков погрешен правец што е парадокс. Истакнав дека и покрај тоа што некои луѓе ќе се развиваат на начин што некои спиритуалности ќе може да се вдомат во нив, материјализмот ќе се шири под влијание на темните духови и ќе работи против ова. Ќе се бори против ова со физички средства. Ви кажав дека духовите на темнината ќе ги инспирираат нивните човечки домаќини во кои престојуваат, да најдат вакцина која ќе ја истиснува сета инклинација кон спиритуалноста надвор од душите уште додека се многу млади. Денеска телата се вакцинирани против едно или друго нешто. Во иднина децата ќе се вакцинираат со супстанца што сигурно ќе биде возможно да биде произведена и ќе ги направи имуни и нема да развиваат инклинација кон духовен живот. Глупаво, во очите на материјалистите. Почетокот е поставен ама само во светот на литературата каде е помалку штетно. Има обиди да се разбере генот на Фердинанд Мајер, Виктор Шефилд, Ниче, Шопенхауер и покажано е дека страдале од абнормалности. Луѓето се обидоа да ги разберат и Исус Христос и евангелието од оваа гледна точка. Две публикации постојат каде почетоците на христијанството се вели дека се поради фактот дека на почетокот на нашата ера, живееле луѓе што биле ментално и психолошки абнормални. Овие луѓе во Палестина каде што бил и Христос инфицирале луѓе со христијанството. Како што кажав ова се почетоците, во полето на литературата. Целото поле оди во насока каде конечно ќе биде најден пат да се вакцинираат телата така што нема да го дозволуваат овие тела „запалението“ кон духовни идеи да се развие. И цел живот луѓето ќе веруваат само во физичкиот свет што го гледаат со сетилата. Надворешните импулси што медицината ги гледа низ претпоставки, пардон, низ конзумација од кои самите страдаат, луѓето ќе бидат вакцинирани против овие претпоставки. И на ист начин ќе бидат вакцинирани кон секоја инклинација кон духовност. Ќе ви дадам примери на нешта што ќе дојдат во блиската и подалечната иднина во ова поле. Целта е да се воведе конфузија во импулсите кои се приземјени после победата на духовите на светлината.
Рудолф Штајнер е филозоф роден во 1861 година во Австрија и е основач на антропозофијата, езотерично спиритуално движење што тврди дека низ медитација и концентрација, индивидуите може да го користат физичкиот свет за да се поврзат со духовниот. Штајнер верувал дека мислењето на човекот е патот кон спиритуални и други опсервации. Ова движење започнало во Германија во раниот 20 век и неговите идеи се аплицирани во многу полиња од животот како образование, архитектура или здравство. Тоа довело до постоењето на цели вакви „Штајнер“ училишта (ги има во 60 земји ширум светот). Во 2019 година, официјалното соопштение од интернационалниот центар за антропозофска медицина и на Интернационалната федерација на антропозофски медицински здруженија, јасно наведува дека тие не го поддржуваат антивакциналното движење. Рудолф Штајнер не се противел на вакцинацијата, но тврдел дека детските болести се важни за растот и развојот на детето, што водело до тоа некои да се сомневаат дали вакцините се потребни. Направени се студии кои покажуваат дека има неколку епидемии на сипаници во Европа, поврзани со ова антропозофско движење. Иако нема студии за тоа колку луѓето во антропозофските кругови се вакцинираат, се чини дека покриеноста со вакцини е пониска од онаа на општата популација. Изминатата деценија се појави загриженост од страна на научните кругови, за улогата на антропозофското движење во епидемиите на сипаници. Во некои држави како Шведска и Германија, овие антропозофски друштва се обележани како такви што одбиваат вакцини, а за тоа имаат известувано медиумите во ковид пандемијата.
Мајкл Блум, специјалист за политички и религиозни науки, за Франс Прес посочува дека вакциналниот скептицизам е висок во планинските региони низ јужна Германија, Швајцарија и Австрија, каде што опстојува антропозофијата. Многу антропозофи веруваат во кармата, што значи дека според нив болестите може да откупат гревови сторени во претходниот живот и да донесат духовен развој. Затоа во овие училишта на Штајнер има многу скептици за вакцините кои се и теоретичари на заговори, вели тој. Не постојат никакви докази дека вакцините духовно го отепуваат човекот. Вакцините спасуваат животи. Се проценува дека само вакцините против сипаници спречиле над 21 милион смртни случаи помеѓу 2000 и 2017 година. Вакцинацијата помага да се стават под контрола над 20 болести како туберкулоза, дифтерија, детска парализа, сипаници, заушки и многу други, кои без вакцините би биле смртоносни за многу луѓе ширум светот. Само во 2021 година, вакцините против ковид-19 спасија 14.4 милиони животи насекаде во светот. Вакцинацијата исто така ја намалува можноста да се појават нови варијанти, тврдат од Светската здравствена организација. Податоците на Светската здравствена организација (СЗО) покажуваат дека вакцинирањето спречува два до три милиони смртни случаи од болести во светот секоја година. Придобивките од вакцинацијата се обезбедување на здраво поколение, колективен имунитет, спречување на ризикот од заболување, намалување на трошоците за боледување и лекување, спречување инвалидитет и други последици, спречување смртност од заболувањето, создавање отпорност на организмот кон заболувањето.
Вакцините може да превенираат чести болести кои сериозно им наштетуваа, па дури и ги убиваа новороденчињата и возрасните. Без вакцини вашите деца се во ризик сериозно да се разболат, па дури и да умрат од детски болести како сипаници и магарешка кашлица. Секогаш е подобро да се превенира болест отколку да се третира кога таа ќе се случи. Вакцинацијата е безбедна и многу ефективна. Препорачаниот вакцинален календар е создаден согласно тоа кога за детето има веројатност да биде изложено на болести и која вакцина би била најефективна. Вакцините се тестирани за да се осигури дека може да се даваат безбедно и ефективно кај препорачаните возрасти, наведува Центарот за контрола и превенција на болести. Навремената вакцинација текот на детството е од суштинско значење, бидејќи помага да се обезбеди имунитет пред децата да бидат изложени на потенцијално опасни по живот болести. Вакцините го заштитуваат здравјето на децата. Сите вакцини од редовниот календар за имунизација се сигурни и проверени, произведени од врвни светски фармацевтски гиганти, кои вложуваат во развојот на вакцините, нивното испитување и квалитет. Вакцината против некои болести е задолжителна во 12 земји од ЕУ. Медицината базирана на докази потврдува дека вакцините спречуваат болести и спасуваат животи. Не навлегувајќи во религиозните и спиритуалните верувања изнесени во објавата што ја рецензираме, оценуваме дека делот во кој се тврди дека „вакцините се за разболување и депопулација“ е невистинит. Нема докази дека вакцините „духовно го отапуваат“ оној што ги прима како што невистинито се наведува во објавата. Милиони религиозни луѓе во светот и такви што се посветени на духовноста, се вакцинирани. Во земјава за време на ковид пандемијата и католичката црква и ИВЗ и МПЦ препорачаа вакцинирање. Поради сите горенаведени факти објавата што ја рецензираме ја оценуваме како невистина што се однесува на делот од објавата дека „вакцините ја истиснуваат спиритуалноста на луѓето“ и дека „се средство за разболување и депопулација“. Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар. Извор: Новинска агенција МЕТА
