Пазарната инспекција на Државниот инспекторат од 7 февруари до 7 март констатирала одредени прекршоци во 251 од вкупно 902 инспекциски надзори за спроведување на одлуката на Владата за ограничување на цените на мало, извести Државниот инспекторат на Хрватска. Одлуката за директни мерки за контрола на цените за одредени производи и одредени категории производи во трговијата на мало стапи на сила на 7 февруари, а оттогаш до 7 март се извршени 902 контроли, од кои 72,2 отсто или 651 не констатирале прекршоци, објави ДИРХ. Да потсетиме, Владата со одлука го прошири списокот на производи со ограничени цени, па така на претходниот список кој беше формиран во септември 2023 година имаше 30 производи, а сега има 70.
За 30 производи кои веќе се најдоа на списокот, цените останаа непроменети, со одредени корекции за виршлите, јаболката и тоалетната хартија. Воедно, највисоките цени за групата од 30 производи важат за сите производи, без разлика на производителот. За новите 40 производи, трговците мора да обезбедат најмалку еден вид на артикли од истата категорија на производи и да ја применат одлуката за ограничување на цената. Кога одреден производ е исцрпен, обврска на трговецот е да вклучи друг по ограничена цена. Од 251 инспекциски надзор во кои се констатирани одредени прекршоци, инспекторите избројале дека за 747 производи (артикли) трговците не истакнале визуелна идентификациона ознака, за 147 производи од категоријата 30 производи биле продадени над максимално дозволената цена. За 242 артикли од категоријата 40 производи, утврдено е дека трговците не поставиле цена за најмалку еден артикл до највисокото ниво на дозволената цена и истата ја нудат во понудата, објави „СЕЕ.биз.еу“.
