Европската Комисија го претстави акцискиот план за европската автомобилска индустрија, кој треба да ги подобри состојбите во секторот погоден од криза, јави „Јуроњуз“. „Сакаме да обезбедиме европските производители на автомобили, добавувачи и сродни даватели на услуги да останат иновативни, конкурентни и цврсто закотвени во Европа“, изјави за медиумите еврокомесарот за транспорт Апостолос Цицикостас.
Автомобилската индустрија сочинува седум отсто од европското индустриско производство и вработува околу 14 милиони луѓе, според Комесарот за транспорт. Но, додава тој, не се работи само за бројки. Луѓето, вели тој, се горди на автомобилската индустрија. Но, таа е во опасност. Комисијата ја гледа автомобилската индустрија на ЕУ во критична пресвртница поради брзите технолошки промени и зголемената конкуренција, пишува Дојче веле. Притисокот главно го врши кинеската конкуренција. Европските производители на електрични автомобили имаат мали шанси на кинескиот пазар. Спротивно на тоа, кинеските производители се обидуваат да стекнат основа во Европа со достапни електрични автомобили. Американската закана да воведе казнени царини за челик и алуминиум, исто така, предизвикува загриженост кај производителите на автомобили бидејќи стравуваат од зголемување на цените.
Планот што сега го презентира Европската комисија се заснова на разговори со претставници на автомобилската индустрија. Целта е да се направи индустријата подготвена за иднината. Комисијата сака да обезбеди европската автомобилска индустрија да не заостанува понатаму во клучните технологии како што е вештачката интелигенција. Затоа сака да собере актери кои развиваат возила од „следната генерација“. Ова ги вклучува рамковните услови за развој и тестирање на самоуправувачки автомобили во ЕУ. Европската комисија има намера да обезбеди една милијарда евра за заеднички иницијативи меѓу индустријата и јавниот сектор. Во моментов, само 15 отсто од сите нови возила продадени во ЕУ се електрични. За да се стимулира побарувачката за автомобили со нула емисија, Комисијата сака да разговара со земјите-членки за шемите за поттикнување, како што се даночните олеснувања.
