Австрија, која традиционално се смета за една од најстабилните економии во Европа, сега се бори со сериозни економски предизвици кои ги надминуваат ефектите од глобалните кризи. Како последица на пандемијата, високата инфлација и скапата енергија, секој австриски граѓанин претрпува загуба од околу 2400 евра. Австрија се соочува со уште една година на економски пад, според најновата прогноза на Рајфајзен рисрч, која беше објавена во текот на вчерашниот ден. Според истражувањето, годинава се очекува австриската економија да се намали за 0,7 проценти, што значи дека земјата влегува во трета последователна рецесиона година од почетокот на пандемијата.
Како резултат на тоа, се проценува дека секој австриски граѓанин ќе претрпи загуба од околу 2400 евра. Веќе во 2024 година, Австрија беше на дното на листата според економскиот раст во Европа, а подобрување на ситуацијата на краток рок не е на повидок, се вели во анализата на банката. Во декември, економските институти Вифо и ИХС предвидуваа раст од 0,6 односно 0,7 проценти за оваа година, но Рајфајзен рисрч истакна дека нема знаци за промена на расположението, ниту кај индустријата ниту кај потрошувачите. Дополнителен притисок врз економијата прават и структурните проблеми, мерките за штедење на владата и можните царини од САД. Според економистот Матијас Рајт, Австрија се движи кон трета „изгубена година“ од економски аспект. Приватната потрошувачка остана еднo од најголемите економски разочарувања во 2024 година, бидејќи зголемувањето на приходите не се претвори во трошење, туку во штедење.
„Значајно заживување на приватната потрошувачка е под знак прашање. Штрајкот на потрошувачите би можел да продолжи и во 2025 година“, додава Рајт.
Индустриската рецесија дополнително се продлабочи во 2024 година. Според Рајт, индустријата била во уште полоша состојба само во 2020 година (поради пандемијата) и во 2009 година (финансиската криза). Извозот на индустриски производи во 2024 година, беше послаб во речиси сите земји од еврозоната. Ова е резултат и на зголемените извозни цени, кои во Австрија пораснаа повеќе од која било друга земја во еврозоната. Рајт очекува дека намалената конкурентност на австриските извозни компании и оваа година ќе влијае негативно врз извозната статистика. Иако владините мерки за штедење се неопходни, според Рајфајзен рисрч, тие доаѓаат во незгоден момент.
„Економијата е веќе во застој и ѝ е потребен поттик, а наместо тоа, дополнително ѝ се поставуваат пречки. Структурните проблеми не би биле решени со таков поттик, но економијата би можела барем малку да се придвижи“, вели Рајт.
Консолидацискиот пакет од 6,3 милијарди евра, или 1,3 проценти од БДП, ја намалува економската активност за половина до еден процентен поен. Ситуацијата во САД, исто така, предизвикува загриженост. Американскиот пазар беше важен столб за австрискиот извоз во последните години, компензирајќи ги слабите извозни резултати, особено кон Германија. Но, можните царини од САД би можеле да ѝ одземат на Австрија најмалку 0,5 процентни поени од економскиот раст годинава, според Рајфајзен рисрч. Структурните проблеми го спречуваат посилното економско закрепнување и значат дека Австрија би можела да учествува под просекот дури и ако дојде до поголем економски раст во Германија или Европа, се вели во анализата. Реалната економска активност на крајот на 2024 година беше за речиси четири проценти под нивото од вториот квартал на 2022 година. Според прогнозите, ова ниво нема да биде повторно достигнато до 2029 година. Пандемијата, високата инфлација и скапата енергија – сите овие кризни состојби оставија длабоки траги, а секој австриски граѓанин загуби околу 2400 евра од сопствената благосостојба, пресмета Рајфајзен рисрч. Овој пад на животниот стандард беше поголем само во неколку други земји.
