„Изборниот фалсификат е веројатно многу пораширен од она што Уставниот суд го прифати како неспорно утврдено во случајот со делумното поништување на последните парламентарни избори во октомври минатата година“, пишува бугарскиот портал Медиапул по вчерашната одлука со која 16 актуелни пратеници од сите парлементарни партии ги загубија своите места, на сметка на влезот на 10 пратеници на Величие, која според официјалните резултати од изборите во октомври минатата година не успеа да го помине изборниот праг од четири проценти за многу мал број гласови. Уставниот суд поништи најмногу гласови (1.110) од партијата на Дељан Пеевски, ДПС – Нов почеток. На второ место е ГЕРБ со 452 избришани гласови. „Сепак, образложението на судот ги истакнува постојаните сомнежи или утврдени прекршувања во однос на изборните единици во кои партијата на Дељан Пеевски има особено добри резултати. Најчесто споменувана изборна единица е Благоевград, каде ДПС – Нов почеток освои дури 21,5% од гласовите и е втора сила по ГЕРБ (32,8%). Многу често се спомнуваат сомнежи или прекршувања констатирани при гласањето во Пазарџик, Карџали и други области, каде што е силна партијата на Пеевски. Во рамките на уставните надлежности, Уставниот суд ги прифати заклучоците на вештаците за гласање на 1.768 избирачки места, што е околу 15 отсто од сите места во државата. Вештаците наидуваат на бројни прекршоци кои предизвикуваат назначување на посебно вештачење“, пишува Медиапул.
По одлуката на Уставен, Централната изборна комисија на Бугарија соопшти кои партии колку пратенички места ќе загубат на сметка на влегувањето на Величие со 10 пратеници во Народното собрание. Така владејачката партија ГЕРБ-СДС загуби три места, па сега има 66 пратеници, ПП-ДБ – едно место, а остануваа 36, Преродба на Костадинов загуби две места и сега има 33 пратеници, ДПС – Нов почеток падна на 29 пратеници, односно еден помалку, БСП-Обединета левица загуби еден пратеник и сега има 17, АПС остануваат со 19 пратеници, а Има таков народ падна на 17 пратеници, со еден помалку. И најмалата пратеничка група на МЕЧ загуби еден пратеник и сега има 11. ЦИК ги објави имињата на новите 16 пратеници во Народното собрание меѓу кои е и лидерот на Величие Ивелин Михајлов. На местата од два пратеници на ДПС- Нов почеток влегува само еден пратеник, а тројца пратеници на ИТН излегуваат, но влегуваат други двајца од истата партија, а истото се случува и со МЕЧ. Дел од новите пратеници веќе положија заклета и почнуваат со работа во Народното собрание на Бугарија. Борисов очекува хаос
Лидерот на ГЕРБ, Бојко Борисов, пред одлуката на Уставниот суд коментираше дека евентуалниот влез на партијата „Величие“ во парламентот ќе го блокира влезот на Бугарија во еврозоната и дека деветтата партија во парламентот ќе направи поголем хаос.
Откако стана извесна промената во парламентот со влезот на 10-те пратеници на Величие, Борисов коментираше: „Заговорот успеа и нè ограбија. Претседателот Радев не може да продолжи со лицемерието бидејќи сето тоа го направија неговите судии“, рече Борисов и додаде дека кога парламентот номинира уставни судии, тие поминуваат низ комисии, расправи и се знае кој кого предложил, додека претседателот ги именува сам.
За констатираните прекршувања на изборите, Борисов рече дека „за Софија, за округот Триадица, пишувањето нула и крадењето на мнозинството покажува дека желбите за пад на оваа влада се веќе очигледни“. Новата бугарска влада на премиерот Росен Жељазков по многу договарања, калкулации и отстапки беше избрана на седницата на 16 јануари и во неа освен победничката ГЕРБ-СДС влезе и БСП и Има таков народ (ИТН), а доби и поддршка од фракцијата на Ахмед Доган АСП. Новата влада во парламентот беше изгласана со 125 гласови „за“, од вкупно 240, а сега со влезот на Величие кревкото мнозинство кое ја поддржува владата падна на 121 пратеник. Што утврди Уставниот суд. Бугарскиот Уставен суд подетално со ангажирање на вештаци го бараше фалсификатот на изборите од 27 октомври и откри 95 хартиени ливчиња во областа Враца, 72 ливчиња од Монтана и 106 хартиени ливчиња од регионот на Плевен се фалсификувани. Не беа пополнети од поединечни гласачи, туку најверојатно од еден или двајца поединци. Друг проблем на изборите во Бугарија е можноста да се контролира гласањето со мобилна гласачка кутија кое се однесува на болни и изнемоштени лица кои поднесуваат барање да гласаат од дома, но проверката покажа дека на пример, во Пазарџик со мобилна гласачка кутија гласале вкупно 271 гласач, при што најголем дел од нив, 95 отсто (258) гласале за една политичка парија, а тоа е ДПС – Нов почеток на олигархот Дељан Пеевски кој не влезе во владината коалиција што остава простор за сомневање од манупулации.
Уставниот суд посочува дека видео надзорот придонесува за поголема транспарентност при пребројувањето на гласовите и директно се одразува на легитимноста на изборната претставничка власт, но додава дека немањето законски утврдени директни правни последици од неспроведувањето на видео надзорот што директно зависи од членовите на изборната комисија на избирачко место. Судот констатира дека најголем број камери (20) не биле намерно вклучени во Карџали и Благоевград (7). Увидот на судот исто така констатирал најчест недостиг на гласачки ливчиња во ИЕ Благоевград, а непосредно пред изборите, направени се промени во составот на месните изборни комисии пред сè од страна на партијата на Пеевски што потоа резултирало со нерегуларни записници од пребројувањето на гласачките ливчиња. Во ИЕ Пазарџик, процентот на записници кои не се во согласност со законските услови е 24%, за 01 Благоевградски изборен реон и за 15 Плевенски изборен регион – близу 30%, за 16 Пловдив изборен регион и 20 Силистренски изборен регион – скоро 32%, а за 23 Софиски регион промените се речиси 32%. Партиски реакции по одлуката на Уставниот суд. Костадин Костадинов на Фејсбук ја коментираше одлуката на Уставниот суд да го прогласи за незаконски изборот на 16 пратеници. И лидерот на Преродба изјави дека на Виктор Папазов и Светослав Тодоров од неговата партија им престанале мандатите.
„Уставниот суд отстрани двајца од најактивните бугарски пратеници за да ја внесе со фалсификат Величие во парламентот. Бидејќи еден пратенички мандат е приближно 10.000 гласа, тоа значи дека вчера во канта за ѓубре беа фрлени гласовите на 20.000 Бугари кои гласаа за Преродба. Во пракса, за да ја внесе патерицата на Пеевски во парламентот, Уставниот суд изврши државен удар и ги фалсификуваше изборните резултати“, пишува Костадинов. „За да излезе вистината за резултатите од парламентарното гласање, гласовите мора да се најдат и прецизно да се бројат, а не да се уништат. Уставниот суд уништи 780 гласа и директно внесе партија во Народното собрание која инаку немала доволно гласови, изјави претседателот на пратеничката група на Има таков народ, Тошко Јорданов. Пратеникот е на став дека не е проблем да се владее со 121 пратеник, бидејќи разликата со претходната бројка (126) не е голема. „Единствено ако некој се разболи или е зафатен, тоа би било проблем при донесување одредена законска регулатива“, додаде Јорданов. Претседателот на Величие, Ивелин Михајлов, кој влезе во парламентот како пратеник, нагласи дека партијата ќе формира пратеничка група и нема да соработува со Борисов и Пеевски од кои, откри, добил парична понуда од 5-100 милиони лева, ден по изборите, од едниот за да се откаже од борбата за гласовите, а од другиот да влезе како партија и да ги поддржи ГЕРБ и ДПС – Нов почеток. „100% со ГЕРБ, ДПС-Нов почеток, БСП и ИТН не можеме да имаме допир. Опозицијата во моментов се ПП-ДБ, МЕЧ и Преродба. Верувам дека ако АПС на Ахмед Доган види дека има можност да го урне моделот Пеевски, а тоа значи и на Борисов, тогаш би направиле флуктуирачко мнозинство во опозицијата“, рече Михајлов. Лидерот на ДПС- Нов почеток Пеевски коментираше дека „нема да има пуч“ и се чувствува како личност која ќе ја спаси Бугарија. „Да бидам јасен – да им се обратам на глутниците, на пудлиците, на оваа партија, на разни фараони, пирамиди и секакви други измислени фигури кои влегуваат и излегуваат од овој парламент преку задниот влез – нема да ја турнете државата. Ако се бунтувате на улица, и јас ќе извадам народ насекаде во земјата, каде што ќе се бунтувате. Нема да има преврати, ќе има Бугарија. И повеќе – Бугарија ќе биде европска и атлантска. И луѓето ќе имаат финансии бидејќи буџетот ќе помине“, рече Пеевски.
