Боре Видевски, каратистот од Велес, кој е еден од обвинетите за убиството на Вања Ѓорчевска и Панче Жежовски, сведочеше на денешното рочиште. Тој за време на истрагата го призна злосторството, но по неколку дена се предомисли и го смени исказот. Па така и денеска, за разлика од Велибор Манев, кој имаше признание за двојното киднапирање и убиство, негираше било какво учество во ова злосторство. На прашањето на неговиот адвокат, Бојан Манев, што правел на 21, 22 и 23 ноември, кога се подготвувало киднапирањето и убиството на Панче Жежовски, тој рече: -На 21-ви бев на работа. Вечерта бев на слава, бев дома. На 22-ри бев на работа, како и на 23-ти. И на 24-ти бев на работа, рече Видевски. Тој ја кажа неговата верзија, за тоа зошто се собирале со останатите обвинети пред домот на Манев, вечерта пред убиството на Жемовски, за што има и видео снимки. -Од одредени сознанија на претседателот на партијата ,,Десна”, Палевски, имаше некакво стравување дека има опасност да се смени името на МПЦ, во црква на Северна Македонија. Се заземаа ставови. Имавме задача членовите, поточно доброволно беше да собираме декларации низ целата држава, најмалку 150.000. Да се направат литии низ црквите. Првата литија требаше да биде во Велес, па тоа што се гледа на видеата е една таква подготовка, рече каратистот.
На прашањето каде се наоѓа на 25, 26 ноември, односно вечерта пред грабнувањето на Вања, обвинетиот рече дека бил во Велес. – На 26-ти Велибор ми се јави дека треба да одиме за Скопје. Дојде со колата и ме зема. Отидовме во просторијата на партијата. Палевски имаше поткаст, и затоа подоцна отидовме. Разговаравме и се задржавме многу доцна. Преспавме, станав кон 10 часот и си отидовме за Велес, рече Видевски. Тој велеше дека откако го уапсиле бил тепан од полицијата, му зборувале за убиствата и барале да зборува. -Не знаев каде да се бранам, затоа што удираа секаде. Единствено по главата не ме удираа. Цело време додека траеше тоа, буквално ми презентираа што се случило и ме прашуваа зошто сум го направил тоа. Ми покажуваа слики од нивните телефони. Имаше слики и од убиеното девојче. Имаше повеќе слики. Една ми ја потенцираа цело време. Се гледаше лев дел од шофершајбна и странично стакло на врата. Се гледаше дел од човек, во адидас тренерка. Пак ме тепаа и ми рече еве си ти на сликата, рече обвинетиот. Тој посочи дека најголем дел од ударите биле во делот на стомакот, каде што има трансплантиран бубрег. -На крај го постигнаа тоа што го сакаа. Да добијат изјва дека сум виновен. Ја направија изјавата и ме тераа да потпишам. Ме прашаа дали го знам таткото на девојчето. Еден ме тепаше со дрвена палка и рече ќе те убијам ако не кажеш, рече обвинетиот.
Кога завршило се, како што рече, го вратиле во ќелија, а потоа го однеле во Обвинителатвото. -И таму ја додов истата изјава, бидејќи бев под голем страв. Од страв и реков дека немам повреди, сведочеше Видевски. Тој посочи дека постојано бил тепан, а и до ден денеска бил под психичко насилство и закани. Обвинителката истакна дека на него не забележала дека има некаква повреда, ниту пак тој се пожалил, ниту пред неа, ниту пред неговиот адвокат. Исто така не се пожалил ниту пред судијата на претходна постапка, каде што бил прашан дали се чуствувал добро, а тој одговорил потврдно. Обвинителката, коментирајќи дека работел како тренер по карате, го праша зарем храброст не е одлика на каратистите, на што обвинетиот рече: -Но и каратистите имаат семејства и некогаш потклекнуваш за нив. Видевски посочи и дека го возел возилото ,,рено кангу”, кога се вршела преселбата на партијата. Ова прашање очигледно беше во насока да се оправда неговата ДНК најдена во возилото. Обвинителката поентираше дека обвинетиот и покрај тоа што тврди дека критичните денови бил на работа, не повика сведоци за да го докаже истото. Исто така, не повика ниту сведоци за тврдењето дека вечерта пред убиството на Панче имал слава, појаснувајќи дека биле само домашните. Судењето е во тек.
