Љупчо Палевски имал пиштол, но во 2023 година му бил одземен во Демир Капија. Овој момент го опиша обвинетиот Влатко Кешишев на денешното рочиште за убиството на Вања Ѓорчевска и Панче Жежовски, по прашања поставени од обвинителката. Тој претходно сведочеше дека Палевски во раката држел пиштол и ја убил малата Вања. Обвинетата четворка, односно Палчо, Кешишев, Велибор Манев и Боро Видевски, во 2023 година заминале во Демир Капија да бараат злато. -Вељо не натера сите да одиме во Демир Капија за да бараме злато во една пештера. Вељо и Боре влегоа во пештерата, а јас и Палчо седевме покрај реката. Запаливме цигара и ги чекавме да излезат. Во меѓувреме дојде полиција. Не праша што правиме таму. Ги претресоа Боре и Вељо, а и го најдоа пиштолот на Палчо. Го однесоа во Неготино во полициската станица. Потоа го пуштија и се вративме во Скопје, рече Кешишев. Потоа обвинителката повторно се наврати на двојното убиство.
Кешишев одговарајќи на прашања истакна дека не знаел дека се спремаат убиства, туку само грабнување. -Ми рекоа никој не смее да дознае за ова, зошто може глави да летаат. Палчо и Велибор го одбраа местото викано Дупки во Велес, за да ископаат дупка за грабнатите, сведочеше Кешишев.
Обвинителката го праша обвинетиот дали е точно дека во телефонскиот именик Љупчо Палевски му бил мемориран како Царот. Кешишев одговори потврдно. На прашањето на обвинителката, дали тоа значи дека слуша се што му каже Павески, Кешишев истакна: ,,Па да”. Обвинителката, повикувајќи се на психијатриското вештачење рече дека Кешишев бил оценет од докторот како психички здрав и со уредна интелегенција. Па го праша, дали ова значи дека за се што правел бил свесен за своите постапки? -Па не баш свесно. По навика што му бев послушен. Палчо ми каже да не зборам многу, да ќутам и да бидам настрана, рече обвинетиот. Тој истакна и дека не можел да го пријави Палевски во полиција, откако сфатил дека убил девојче. -Не можев да го предадам, ниту бев свесен што точно се случи, рече Кешишев. Судењето е во тек.
