Семејството на Наташа Совраноски, 25-годишната жена и мајка на едногодишно девојче, која 25 дена откако исчезна беше пронајдена убиена во шума во Германија, се уште ја чека правдата, за настанот кој се случи во септември, минатата година. За случајот ,,Фокус” пишуваше во повеќе наврати. Во времето додека се трагаше по младата жена, со македонски корени, чиј татко Милчо живее во Охрид, апелот за нејзиното исчезнување се споделуваше и во Македонија, во надеж дека евентуално, можеби таа дошла во земјава. Откако потрагата заврши со лош крај, односно телото на Наташа беше пронајдено во шума, во германскиот полициски билтен се објави веста дека се истражувало дали се работи за убиство. Исто така, од таму соопштија дека бил притворен 45-годишен маж, кој бил осомничен за убиство од небрежност. Како што за „Фокус“ изјави нејзиниот татко Милчо Совраноски, станувало збор за партнерот на Наташа, Германец по потекло, со кого таа живеела во вонбрачна заедница и имале заедничка ќерка. Тој појаснуваше дека парот имал проблеми и несогласувања, тој бил невработен и единствено Наташа заработувала за семејството.
Денес, во разговор за ,,Фокус” Милчо вели дека семејството е разочарано од текот на настаните, бидејќи откако поминал шест месеци во притвор, осомничениот за убиството на ќерка му, деновиве бил пуштен на слобода да го чека судењето. – Тој е сега слободен човек, таков бил законот, не може да се држи во притвор повеќе од шест месеци. Имал обврска секоја вечер да се јавува во полиција, носи алка за електронски надзор, позната како наногица, и дома ќе го чека судењето кое е закажано во јуни. Ние сме разочарани! Сестрите на Наташа, кои живеат во Германија, нејзината мајка, која е моја поранешна сопруга, сите сме затекнати од оваа вест која не ја очекувавме. Веста дури и се објави во германските медиуми. И таму наиде на бурни јавни реакции.
Од она кое го знаеме, Наташа била убиена дома, а потоа телото и било однесено во шумата, каде беше пронајдено по 25 дена. Но, тој, осомничениот за убиството, тоа не го признава, така е подучен од неговиот адвокат, и нам ни преостанува само да го чекаме судењето и да се надеваме на правда, раскажува Милчо.
Додава дека додека се чека судска разврска, најмногу страда ќерката на Наташа, како и сите членови на неговото семејство, бидејќи девојчето не било кај нив, туку го згрижила државата. – Ете, и тоа е по тамошните закони. Нашата внука сега е под закрила на државата, не е со нас, иако тоа го баравме уште од самиот почеток. Официјално, таткото е старател на девојчето, се додека не се докаже на суд дека е виновен за убиство. Според тоа, додека нема судска завршница, ние не можеме да си го земеме детето. Мора да чекаме пресуда, па ако се докаже дека е виновен, тогаш ќе се бориме за старателство над нашата внука. Уште кога дознавме дека Наташа е убиена, кажав дека ќе се бориме за нејзината ќерка, дека ќе си донесам внуката овде, во Охрид, и ќе се грижам за неа, раскажува Милчо. Вели дека ќе замине во Германија да присуствува на судењето и се моли да има правда за неговата ќерка. Откако беше пронајдено телото на Наташа, во Германија имаше јавни реакции и од тамошни здруженија кои им пружаат поддршка на жените – жртви на семејно насилство. – Запрепастени сме и сочувствуваме со загубата на 25-годишната Наташа од Бад Тејнах Завелштајн. Младата жена и мајка, која беше исчезната од втори септември 2024 година, беше пронајдена мртва на 27ми септември, како последица на насилство. Јавното обвинителство потврди дека осомничениот бил во врска со Наташа. Ваквите ужасни настани не потсетуваат сите колку е важно да се залагаме за правата и заштитата на жените за да се осигураме дека насилството врз жените нема да се толерира! На секои четири минути една жена доживува насилство од нејзиниот партнер или поранешен партнер. Секој трет ден жена во Германија е убиена од нејзиниот партнер или поранешен партнер. Сепак, насилството во сопствените четири ѕида премногу често се премолчува во јавните дебати и се отфрла како приватна судбина. Престанете со насилството врз жените! Престанете да убивате жени! Престанете со фемицидот! Жените од Управниот одбор и вработените во здружението им помагаат на жените со безрезервна поддршка, беше наведено во соопштението кое го објави германското здружение „Frauen helfen Frauen e.V. Calw“.
