Американскиот претседател Доналд Трамп воведе нови увозни царини за 60 држави, меѓу кои е и Македонија, за која е поставена царинска стапка од 33 отсто. Тоа значи дека американските увозници ќе треба да платат дополнителна давачка во вредност од една третина од вредноста на македонските стоките, па се очекува значително да се намали извозот од земјава во САД. Според податоците на Државниот завод за статистика, вкупната размена на Македонија со САД лани изнесувала нешто над 314 милиони долари, наспроти 320,7 милиони долари во 2023 година, што значи била помала за 2,1 отсто. Извозот од Македонија во САД лани достигнал значајни 118,2 милиони долари, што е за 2,2 пати (110 насто) повеќе од претходната 2023 година кога бил 53,6 милиони долари. Истовремено, лани од САД биле увезени производи за 195,9 милиони долари, за 26,6 отсто помалку од 2023 година, кога увозот во Македонија од САД бил 267 милиони долари. Според податоците од американскиот Стејт департмент, главниот македонски извоз во САД лани го сочинувале тутунот, облеката, железото и челикот. При објавување на царините, Трамп порача дека 2 април 2025 година ќе биде запаметен како „Ден на ослободувањето“. Од регионот, Србија е погодена со највисока стапка од 37%, а Босна и Херцеговина со 35%. На стоките увезени во САД од Косово е воведена царина од 10%, исто како и за Албанија.
