Хамас го отфрли последниот израелски предлог за прекин на огнот и ослободување на заложниците, соопштија денеска претставници на палестинската група, објави „Тајмс оф Израел“. Според достапните информации, претставник на Хамас изјавил дека групата одлучила да не го прифати последниот израелски предлог, кој бил доставен преку посредници. Претставници на Хамас го обвинија Израел дека „го блокира египетскиот и катарскиот предлог и се обидува да саботира каков било договор“.
Предлогот на посредниците предвидуваше ослободување на пет заложници во рок од 50 дена во замена за 250 палестински затвореници, од кои 150 отслужуваат доживотна казна затвор, како и 2.000 затвореници од Газа. Исто така, веднаш требаше да започнат преговорите за траен прекин на огнот и целосно израелско повлекување од Газа. Меѓутоа, Израел го отфрли предлогот, барајќи 10-те заложници веднаш да бидат ослободени, на првиот ден од 40-дневното примирје, во замена за 120 Палестинци осудени на доживотни казни и 1.111 палестински затвореници од Газа. Израелските преговарачи исто така одбија да се повлечат од Газа и поставија услов за демилитаризација на Хамас како предуслов за понатамошни преговори, пренесува Танјуг.
