Како голем вљубеник во природата и планините, пред два месеци на средба со членовите на Алпинистичкиот клуб Скала заедно ја разгледавме потребата во нашата општина да се воспостави систем за планинско спасување, што не само ќе ја зголеми безбедноста на граѓаните во планините, туку и потребата од воспоставуавње на таков сервис како главен предуслов за развојот на алтернативниот и планинскиот туризам во нашата општина и нашиот регион. За таа цел тогаш потпишавме меморандум за соработка со АК Скала кој воедно е и член на Националниот сојуз за спасување на Македонија, со што практично ставивме темел во формирањето на една таква служба на територијата на општина Струмица и со тоа стануваме една до ретките општини во државата со таква доброволна служба. На денешната наша средба и на мој предлог се согласивме дека од сега па натаму на секој следен состанок на Локалниот совет за превенција ќе биде вклучен претставник од Планинската спасителна служба со што таа служба ќе се вклучи во работата на советот и во својот домен и можности ќе допринесе за подигање на нивото на заштита на граѓаните на нашата општина.
