Партијата на Али Ахмети се уште очекува дека заедно со претстојните локални избори ќе се одржат и предвремени парламентарни избори. Партискиот потпретседател Бујар Османи за „Фокус“ вели дека после одлуката за двојни избори ќе се зборува за кадровски решенија. Неофицијално, тој се споменува како можен кандидат за градоначалник на Чаир. Кои се потенцијалните кандидати на Европскиот фронт во Тетово, Гостивар, Струга? Иако власта во неколку наврати ја отфрли можноста за одржување на предвремени парламентарни избори заедно со претстојните локални избори, опозициската ДУИ на Али Ахмети се уште очекува дека годинава ќе има двојни избори, односно дека на есен ќе се бира нова локална самоуправа, но и нов парламентарен состав. –Рано е. Не сме почнале. Очекуваме одлука за предвремени парламентарни избори заедно со локалните, а потоа ќе се зборува за кадровски решенија – вели партискиот потпретседател Бујар Османи, во однос на прашањето на „Фокус“ во која фаза е внатрепартиската процедура за селекција на кандидати за градоначалници, дали се прават анкети…? Неофицијално, Османи се споменува како најсериозен кандидат на ДУИ за градоначалник на скопската општина Чаир, која моментално е под контрола на ВЛЕН. Поточно, актуелниот градоначалник Висар Ганиу на претходните избори беше избран како кандидат на ДУИ, но во меѓувреме стана дел од Демократското движење на Изет Меџити, кое е дел од албанската владејачка коалиција. Што се однесува до другите поголеми општини со доминантно албанско население, според партиски извори, веќе се издвојува фаворит за Гостивар. Станува збор за првиот човек на гостиварскиот огранок на партија Валдет Џафери, кој кус период беше министер за правда. Тој треба да се соочи со Валбон Лимани од ВЛЕН, кој стана в.д. градоначалник откако Арбен Таравари беше избран за министер за здравство. Инаку, слична ситуација имаше и во скопската општина Сарај, чиј претходен градоначалник Блерим Беџети одлучи да остане пратеник на ДУИ во Собранието, а за в.д. градоначалник беше избран Иљаз Весељи. Упатените велат дека Весељи ќе бидат кандидат за градоначалник на следните локални избори, освен ако анкетите не покажат дека ДУИ само со Беџети има сигурна победа.
Наспроти тоа, повеќе потенцијални кандидати има за градоначалник на Тетово. Според наши информации, еден од нив е генералниот секретар на партијата Фатон Ахмети, кој се очекува да зазема се поголема улога во партијата, особено по заминувањето на Артан Груби. Покрај него, во игра за градоначалничка кандидатура во Тетово е и Бајрам Реџепи, потпретседател на ДУИ. Исто така, како трет можен кандидат за градоначалник на Тетово се споменува и пратеникот Илир Демири, кој пред изборите беше министер за здравство. Тој му пропаѓа на крилото на Зијадин Села во Алијанса за Албанците, кое е дел од Европскиот фронт предводен од ДУИ и Ахмети. Меѓутоа, партиски извори велат тој е прифатлив за сите во Фронтот, иако поголеми шанси им се даваат на кадрите на интегративците. Во врска со Алијанса, по разделбата меѓу Села и Таравари партијата се подели, при што се проценува дека поголем дел од членството замина со Таравари. Сепак, Села остана посилен во Струга, па се очекува неговата партија да исфрли кандидат за градоначалник на оваа општина. Како еден од можните кандидати на АА се споменуваше ексминистерот за правда Кренар Лога, но добро упатени извори велат дека партнерите во Фронтот повеќе инсистираат да истрча Села. На последните избори, Европскиот фронт освои повеќе гласови од ВЛЕН и во битката за претседател и во битката за парламентот, меѓутоа ВЛЕН изборните резултати ги толкуваше како сопствена победа, со објаснување дека тие биле чисто албанска коалиција и освоиле исклучиво албански гласови, додека во Фронтот на ДУИ имало и партии од другите „помали“ етнички заедници – турска, ромска, бошњачка.
Откако замина во опозиција, интегративците го критикуваа ВМРО-ДПМНЕ дека не ја испочитувал изборната волја на Албанците, но уште посилно го критикуваа ВЛЕН дека прифатил да биде подреден партнер во власта на штета на интересот на Албанците. Неодамна, од ДУИ најавија и можен бојкот на локалните избори, ако се укине Законот за јазици. –Нема локални избори и не може да се постават кутии за одржување на локалните избори ако се чепка Законот за јазиците. Законот за јазиците не е закон на ДУИ, туку е закон и на сите оние кои ќе се раѓаат додека изгрева сонцето. Затоа, секој Албанец треба да се бори за Законот за јазиците и да не го политизира и проблематизира – порача Ахмети. Потоа, Беџети изјави дека ако се чепне Законот за јазиците ќе дојде до политичка криза. Тој смета дека во таква ситуација не би можеле да се одржат локални избори, па затоа, според него, на државата и се потребни и предвремени парламентарни избори. Но, истакна рече дека не најавиле изборен бојкот. –Ние не сме најавиле никаков бојкот, ние секогаш сме биле и сме спремни за избори, и на последните парламентарни избори, изборниот легитимитет на етничките Албанци, и другите етнички заедници е кај Европскиот фронт. Предвремени парламентарни избори во Собранието како дебата се отвори од сите, почнувајќи од премиерот Мицкоски. Факт е дека на државата и се потребни предвремени парламентарни избори – изјави тој.
