Би сакале да го информираме градоначалникот на општината Карпош дека празнењето на комуналниот отпад од контејнерите и од кантите во индивидуалните домаќинства во оваа скопска општина се одвива согласно редовната динамика предвидена со Оперативниот план за собирање комунален отпад на територијата на Градот Скопје, се огласија од ЈП „Комунална хигиена“.
„ЈП Комунална хигиена-Скопје деновиве забележа загрижувачка појава на диво исфрлање на отпад собран од страна на општинските комунални служби во општината Карпош во садовите поставени од ЈП Комунална хигиена-Скопје меѓутоа и на зелени површини низ општината. Веројатно тоа е причината за неговата неконтролирана реакција во јавност на сметка на КХС. Притоа, градоначалникот со денови објавува фотографии од садовите коишто ги преполнуваат неговите општински служби и за истото сака да ја обвини ЈП Комунална хигиена-Скопје.
Апелираме до Јакимовски да го прочита Законот за управување со отпад и веднаш да престане со подметнувања и неосновани напади, а за непрописното фрлање отпад ќе биде секогаш санкциониран без разлика на неговите реакции, обиди за притисоци и префрлање на вина во јавност“, велат од ЈП Комунална хигиена-Скопје.
Цело Скопје е заробеник на неспособноста на ЈП Комунална хигиена да ја одржува хигиената на градот, обвини претходно градоначалникот на Општина Карпош Стевчо Јакимовски и побара со новиот закон за локална самоуправа ова јавно претпријатие да се подели меѓу општините во градот заедно со парите што ги плаќаат граѓаните за одржувањето на чистотата.
