Високата претставничка за надворешна политика и безбедност на Европската Унија, Каја Калас, изјави дека е важно тоа што нејзиниот американски колега Марко Рубио ја потврдил посветеноста на Вашингтон кон НАТО, додавајќи дека европските земји сè уште треба да бидат посилни. Пред состанокот на министрите за надворешни работи на НАТО во Брисел, таа рече дека Рубио дал гаранции дека САД нема да прават отстапки против интересите и црвените линии на Украина и Европа, пренесува Ројтерс. „Континуираната посветеност на Соединетите Американски Држави кон НАТО останува основата на нашата безбедност“, изјави денеска генералниот секретар на НАТО, Марк Руте, пред состанокот со министрите за надворешни работи на НАТО.
Американскиот државен секретар Марко Рубио вчера изјави дека администрацијата на американскиот претседател Доналд Трамп е посветена на останување во НАТО и ги повика 32-те членки на воената алијанса да ветат дека ќе ги зголемат трошоците за зајакнување на нивните одбранбени способности. Министрите за надворешни работи на НАТО вчера се собраа на дводневен состанок во Брисел, каде што ги разгледуваат понатамошните планови за претстојниот самит во Хаг и разговараат за итните безбедносни прашања.
