Поголем дел ќе оди за дивиденди на акционерите, но значаен дел од ланската нераспределена добивка ќе биде наменет и за резерви. ТТК банка објави дека на неодамна одржаното акционерско собрание била донесена одлука како ќе се распредели добивката од 2024 година по годишната сметка, на сума од 1,76 милиони евра. Од овие средства, за дивиденди за имателите на обични акции ќе бидат исплатени 1,02 милиони евра, додека, пак, за резерви ќе се зачуваат 736 илјади евра. Но, она што е интересно, е дека убава сума ќе добијат како плати и награди менаџерите и членовите на Надзорниот одбор, како и лицата со посебни права и одговорности, а по основ на деловната успешност. Станува збор за сума од 67 илјади евра, кои се вкалкулирани како трошок на банката, а кои ќе се распоредат дел за награди на членовите на Надзорниот одбор, а дел за плата по основ на деловна успешност на менаџментот и на лицата со посебни права и одговорности. А, за членови на Надзорниот одбор, пак, како што веќе пишувавме, на почетокот на ноември годинава беа именувани Бобан Гоговски, Драгица Јовановска, Евгенија Трпоска, Михаил Петковски и Албион Риза.
„Одборот за наградување на членовите на Надзорниот одбор, Надзорниот одбор и Управниот одбор, го извршуваат распоредот на средствата на поединечните членови на Надзорниот одбор, на менаџментот и на лицата со посебни права и одговорности, со посебни одлуки“, се вели во одлуката која поминала на вчерашното акционерско собрание. Кога стануива збор за дивидендите, чии бруто износ е 1,02 милиони евра, банката најавува дека за физичките лица кои се нејзини акционери, ќе задржи и ќе уплати персонален данок на доход, додека, пак, при исплата на правните лица, ќе задржи и ќе уплати данок по задршка. Висината на бруто дивидендата по акција ќе биде 61 денар, односно 6,1 отсто од номиналната вредност на акциите, која изнесува 1.000 денари. Овде треба да се каже дека доминантен и единствен акционер над 5 отсто во ТТК банка, со 41,42 отсто од капиталот, е тетовскиот комбинат Тетекс, што значи дека тие на име на дивиденда ќе земат сума од 423 илјади евра. Всушност, подолг период ТТК банка му ги носи главните приходи на Тетекс, кој, пак, престана со текстилната дејнсот, и приходува или од издавање објекти под закуп, или од продажба на залихи, како и остварува приходи од својата „златна кокошка“ ТТК банка. Датумот на евиденција според кој ќе се определи листата на акционери кои имаат право на дивиденда за 2024 година е 16 април годинава, последен ден на тргување со право на дивиденда е 14 април, а прв ден на тргување без право на дивиденда е 15 април. Во одлуката стои дека дивидендата ќе се исплатува во готово, и тоа на платежните сметки на акционерите.
Важна вест е дека исплатата на дивидендата ќе стартува од 5 мај оваа година. Акционерското собрание, пак, го разгледало и прифатило планот, односно стратегијата на банката за до 2027 година, во кој менаџментот навел дека клучните финансиски индикатори кои Банката со своето работење ќе се стреми да ги оствари во периодот кој следи се, во делот на планираната профитабилност, стапката на поврат на капиталот (RОЕ) да достигне до 11,9 отсто до 2027 година, пораст на бруто кредитите на комитенти до ниво што ќе обезбеди нивно учество во вкупните средства на Банката над 50 отсто, одржување на стапката на адекватност на капиталот и тоа над 17 отсто, и пораст на коефициентот за покриеност на кредитите со депозити од 57 отсто во 2025 до 59,9 отсто во 2027 година. Како што пишувавме во декември, долгогодишниот директор на ТТК Банка, Драгољуб Арсовски, доби уште еден мандат на малата но успешна ТТК Банка, на позициите претседател на УО и Генерален извршен директор на ТТК Банка.
