Македонски Концепт бара неодложно отварање на истрага во врска со скандалозната набавка на недвижен имот за 721 евра по м2 во Центарот на Скопје од страна на политичката партија Левица. Според тврдењата и документацијата обелоденета пред јавноста, постојат железни основи за сомневање во законитоста на оваа набавка со оглед на екстремно ниската цена за имот во центaрот на Скопје која смрди на криминална злоупотреба на јавни средства.
Македонски Концепт бескомпромисно ја поддржува потребата за остра и транспарентна истрага што ќе ги разобличи сите факти во овој случај и сите други случаи. За да се спаси довербата на граѓаните во институциите и да се задоволи правдата, повикуваме Основното Јавно Обвинителство (ОЈО) да ја разгледа оваа валкана набавка која удира по законите на Република Македонија. Дополнително да се “раскопа” што или поточно кој претходен министер или министри го врзуваат Димитар Апасиев и Левица со овој објект – ете му, конечно, златна прилика на Апасиев да ја докаже својата блескава чесност и неподмитливост пред сите граѓани!
Ние сме цврсто убедени дека само преку немилосрдна транспарентност и одговорност може да се згази секоја злоупотреба на јавните ресурси. Политичките партии, вклучително и Левица, не смеат само да блеат, туку мораат да играат по законските и морални правила, за да се обезбеди чиста и фер борба на политичката сцена. Македонски Концепт ќе продолжи да ги следи сите случувања и да се бори за правично, транспарентно и непоколебливо општество.
Со почит, Центар за комуникации и анализа , Македонски Концепт
