Во духот на традицијата и општествената одговорност, Фондот за здравствено осигурување ја реализираше пролетната крводарителска акција „Фондовско Срце“ во подрачната служба во Битола. Акцијата, која веќе дванаесет години претставува симбол на солидарност, оваа година беше проширена со цел хуманоста што повеќе да ја доближи до граѓаните. Со личен пример, генералниот директор Бранко Аџигогов учествуваше во акцијата, упатувајќи јасна порака за важноста на индивидуалниот придонес кон заедничкото добро. По завршувањето на дарувањето, г. Аџигогов заедно со градоначалникот на Општина Битола, прим.д-р Тони Коњановски, дадоа изјава за медиумите и одговараа на новинарски прашања.
„Дарувањето крв е чин на висока општествена свест и одговорност. Градењето култура на солидарност е наша постојана мисија,“ истакна г. Аџигогов.
Со оваа акција, Фондот уште еднаш потврдува дека грижата за заедницата не е обврска – туку вредност што се носи во себе, се живее и се практикува.
