Министерството за надворешни работи и надворешна трговија информира дека, преку Амбасадата на Република Северна Македонија во Варшава, е во редовна комуникација со семејството на починатиот Александар Карадакоски и со надлежните институции во Литванија. Карадакоски, кој беше хоспитализиран во Литванија поради тешките повреди здобиени во пожарот во дискотеката во Кочани, утрово им подлегнал на повредите. Тој имал 36 отсто изгореници на телото и оштетување на дишните патишта во обем од 90 проценти.
„Амбасадата ги презема сите неопходни активности за завршување на конзуларните постапки и за организација на транспортот на телото назад во земјата. Министерството и дипломатско-конзуларното претставништво во Варшава се во постојана комуникација со литванските власти и стојат на располагање за поддршка на семејството“, соопштија од МНР.
Од Министерството дополнуваат дека Кризниот штаб е во координација со сите надлежни институции, а јавноста ќе биде навремено информирана за сите понатамошни детали.
