На состанокот уште еднаш ја нагласивме важноста на Западен Балкан како регион од стратешко значење за НАТО и Европската Унија. Притоа, ја реафирмиравме потребата од натамошно јакнење на стратешкото партнерство меѓу двете организации и нивната комплементарност во заедничките напори за обезбедување одржлив мир и стабилност во евроатлантската област. Ја истакнавме и важноста од побрза интеграција на регионот во Унијата, како суштински фактор за регионална и европска стабилност. Посилен европски столб во рамките на силна НАТО Алијанса ќе придонесе за дополнително зајакнување на трансатлантската стабилност. Во оваа насока беа поздравени новите иницијативи на ЕУ за јакнење на одбранбените капацитети, при што беше нагласена потребата од вклучување на сојузниците од НАТО кои не се членки на ЕУ.
Дополнително, беше изразена силна поддршка за напорите на САД за постигнување траен мир во Украина преку дипломатски пат и дијалог. Потврдени беа и заложбите за зголемување на буџетските издвојувања за одбраната, како и зајакнување на капацитетите и способностите за градење колективна безбедност и одбрана, со цел поефикасен одговор на заедничките закани и предизвици. На маргините на состанокот остварив кратки билатерални средби со генералниот секретар на НАТО, Марк Руте, како и со колегите министри од Обединетото Кралство, Холандија, Романија, Германија, Италија и Црна Гора. Разговаравме за прашања поврзани со регионалната стабилност, безбедност и мир.
View this post on Instagram
