Градежната инспекција на Општина Битола ќе урива три дивоградби. Покрена постапки за три големи објекти, од кои два на патот за Ниже Поле во Битола, од кои едниот како дивоградба опстојувал повеќе од десетина години, а другиот се градел без одобрение за градба. На третиот објект лоциран во населбата Довлеџик се монтирала голема настрешница од челична конструкција, без претходно обезбедено одобрение за монтажа, па градбата е стопирана. „На патот за Ниже Поле при вчерашниот вонреден инспекциски надзор, констатирано е дека се гради објект од челични профили и покривка од панели, а исто така на друг дел од парцелата се изведува конструкција од бетонски столбови, кровна конструкција од челични профили и покривка од панели, без претходно добиено одобрение за градење од Општината.
Од страна на субјектот за надзор укажано е дека освен приложениот имотен лист, не поседува никаква друга документација за градбите. Врз основа на констатираното, согласно изготвниот записник за нелегалните градби ќе следува решение за рушење“, соопштија од Општина Битола. Од таму додаваат дека и кај другиот објект на излезот од Битола, согласно инспекцискиот надзор, ќе бидат преземени истите мерки. Во овој случај, констатирано е дека објектот е дивоградба, а бил изграден пред десетина години, како хала од челична конструкција покриен со панели и приклучен на електрична мрежа. Градежната инспекција извршила увид на уште еден објект во реонот на Дихово, за кој во тек е прибирање на потребната документација за постапување, согласно законските надлежности.
