Израелската влада сподели, а потоа избриша објава на социјалните мрежи во која се изразува сочувство за смртта на папата Франциск, објави „Џерусалем пост“. Израелските медиуми го поврзуваат овој потег со стравот од критики и напади од домашната јавност поради постојаните пораки и генералниот однос на покојниот папа кон уништувачките израелски воени акции врз Палестинците во Газа.
Акаунтот @Israel на социјалната мрежа „Икс“ во понеделникот објави порака со содржина: „Почивај во мир, папа Франциск. Нека е благословен неговиот спомен“, заедно со фотографија од посетата на папата на Западниот ѕид во Ерусалим. Објавата набрзо беше избришана. „Џерусалем пост“ цитира претставници од Министерството за надворешни работи, кои изјавиле дека папата Франциск давал изјави против Израел и дека објавата на социјалните мрежи била објавена по грешка. Министерството за надворешни работи засега официјално не ја коментира ситуацијата. Папата Франциск, кој почина во понеделникот на 88-годишна возраст, во ноември минатата година предложи глобалната заедница да испита дали израелската воена кампања во Газа претставува геноцид врз палестинскиот народ, една од неговите најексплицитни критики на израелското однесување во воените акции против Палестинците кои започнаа по нападите на Хамас врз израелски цивили во октомври 2023 година.
Во јануари, папата ја опиша хуманитарната ситуација во Газа како „срамна“, што предизвика критики од главниот рабин во Рим, кој го обвини Франциск за селективна огорченост. Израел тврди дека обвинувањата за геноцид во неговата воена кампања во Газа се неосновани, нагласувајќи дека дејствува исклучиво против Хамас и другите вооружени групи. Израелскиот премиер Бенјамин Нетанјаху, кој ја предводи екстремно десничарската коалиција составена од верски и националистички партии, не ја коментираше смртта на папата. Сепак, израелскиот претседател Исак Херцог во понеделникот испрати порака со сочувство до христијаните во Светата земја и ширум светот, опишувајќи го Франциск како човек со длабока вера и безгранично сочувство.
Односите меѓу Католичката црква и јудаизмот значително се подобрија во последниве децении, по вековно непријателство. За време на својот 12-годишен понтификат, папата Франциск внимаваше да не зазема страна во конфликтите и често ги осудуваше антисемитските групи. Но, тој исто така одржуваше контакт со малата христијанска заедница во Газа за време на војната. Во 2014 година, Франциск го посети Западниот Ѕид, најсветото еврејско место, и се помоли покрај ѕидот изграден од Израел на окупираниот Западен Брег, кој ги дели Ерусалим и Витлеем.
